Futsal: KNI Cup GM-mut misiliineruvoq
Isikkamik arsaannermi unammiuaarneq timersortarfimmi isiginnaartoqanngitsoq unammisarfimmullu avalasimanngitsut qanermut assiaquteqartussaallutik.
Corona pissutigalugu malittarisassat maanna taamaakkallarput timersornermi aaqqissuussisoqassappat. Taakkorpiaallu najoqqutaralugit KNI Cup sapaat ilanngullugu Ilulissani pisoq ingerlanneqarpoq.
Tassani Nagdlúnguup hold 1-ii ajugaapput klubbeqatitik hold 2 ajugaaffigalugit.
KNI Cup-mi inissinnerit:
1. Nagdlúnguak 1
2. Nagdlùnguaq 2
3. I-69 1
4. Nagdlúnguak Oldboys
5. Qaanaaq Sport Club
6. I-69 2
Akiuulluarnerpaaq: Qillaq Kristiansen, QSC
Arsalerillammak: Peter Leibhardt, N-48 1
Arsallammak: Lars-Erik Reimer, N-48 1
Ujammit bronzeusut I-69 hold 1-nut atitinneqarput taakku bronzenniunnermi Nagdlúnguup utoqqasaartaanut ajugaangamik. Taamaasilluni ukioq ataasingajak unammisoqannginnera kipivoq.
- Aaqqissuussinissamut periarfissaqaqqilernissaanut sivisuumik utaqqivugut. Taamaattumik tamanna misigeqqillugu aliannaarpugut, aaqqissuisut Nagdlúnguup siulittaasua Lena Ravn Davidsen oqarpoq.
GM tullinnguuppoq
Unamminerpassuit piffissap sivikitsup iluani pisussanngorlugit aaqqissuussineq pivoq tassanilu peqatigiiffiit Qaanaameersut aamma Ilulissaneersut peqataapput.
- Arsaateqataasunut aamma nammineq piumassutsimik suleqataasunut sakkortuvoq. Unamminerpassuimmi malinnaaqqissaarfigineqartussaapput, Lena Ravn Davidsen oqarpoq.
- Tamanna uagutsinnut misiliineruvoq tassami futsalimi GM-rtoqarnissaanut martsip qeqqani anngunniunnissaq aaqqissuuttussaagatsigu misiliivugut, Lena Ravn Davidsen oqarpoq.
Qaanaameersut QSC normu 5-nngorput I-69-ip hold 2-i KNI Cupimi normu 6-nngortut.
Futsalimio GM Sisimiuni apriilip aallartilaarnerani pissaaq.