Futsal: I-69ip arnartai pissartanngoqqipput
I-69 Ilulissaneersoq arfininngornermi unnukkut qularnaatsumik GM-mi finalemi tallimaraarluni ajugaavoq GSS Nuummeersoq ataaseraartoq.
Taamaasilluni I-69 2019-mi Ilulissani UB-68 finalemi ajugaaffigalugu pissartaareerluni pissartanngoqqippoq.
Pissartanngoqqinnissap anguniarnera aamma piumassutsimik pissarsiffiusoq I-69-ip anføreria Heidi Jensen oqarpoq.
1. I-69, Ilulissat
2. GSS, Nuuk
3. NÛK, Nuuk
4. UB-68, Uummannaq
5. NÛK U-18, Nuuk
6. S-68, Sisimiut
7. UB-83, Upernavik
8. IT-79, Nuuk
Ukiup iligiivi:
Kristine Nielsen, I-69
Victoria Black, NÛK
Emma Ellehauge, NÛK U-18
Najaaja Lyberth, GSS
Vaya Simonsen, I-69
Akiuulluarnerpaaq:
Saalat Malakiassen, UB-68
Arsalerillammak:
Heidi Jensen, I-69
Arsallammak:
Vaya Simonsen, I-69
- Finalemi ajugaanitsinnut pissutaanerugunarpoq siornalu piareersarluarsimanerput ukiortaamiillu tamanna ingerlatiinnarlugu. Pissartanngoqqinnissarput assut angorusussimavarput, I-69-mi anføreri Heidi Jensen KNR-mut oqarpoq.
Finalemi unammisaat GSS Nuummeersoq sakkortuumik tallimanngornermi unnukkut semifinalemi unammivoq 3-1-mik ajugaalluni. Finalemilu ajorsarneq GSS-ip akueraa.
- I-69-meersut pikkoripput. Takuneqarsinnaavoq ukioq kaajallallugu sungiusartartut. Imminnut sungiusimalluarput. Arsaalerillaqqipput sukkallutillu. Uagut arlaleriarluta isertitsinissamut periarfissaqartaraluarpugut iluatsissanaguli, GSS-mi anføreri Najaaja Lyberth oqarpoq.
NÛK Nuummeersoq bronzennanniunnermi UB-68-mut Uummannameersumut qularnaalluartumik 13-2-mik ajugaavoq.
Vaya Simonsen I-69-meersoq arsallammattut toqqarneqarpoq. Taannaavoq aamma kingullermi GM-rtoqarnerani 2019-mi arsallammattut toqqagaasoq.
Akiuulluarnerpaamik toqqaanermi Saalat Malakiassen UB-68-meersoq uteriittuunini pillugu nersornaaserneqarpoq. Heidi Jensen I-69 Ilulissaneersoq arsalerillammattut toqqarneqarpoq.
NÛK U-18 tallimaattut inissipput S-68 Sisimiuneersoq arfernattut inissittut. UB-83 Upernavimmeersut arfineq aappaattut inissiupput IT-79 Nuummeersoq arfineq pingajuattut inissittut.
Angutit futsalimi pissartanngorniunnerat marlunngornermi nalunaaqutaq 15 aallartisssaq unamminerillu KNR-TV-mi takutinneqarumaarput.
