Aasianni GM-imut anngunniunneq pissanganarluinnartoq
Kugsak-45 Qasigiannguaneersoq angutit inersimasut futsalimi GM-qarnissaannut annguppoq.
Unamminermili aalajangiisumi G-44-mut Qeqertarsuarmeersumut unammineq sivitsorneqareersoq nuannaarluni suaartartoqarsinnaanngorpoq.
Futsalimi GM-mut anngunniunnerit kommunemi pissartanngorniunnertut ingerlapput. Nuummilu GM-qarnissaanut Kommune Qeqertalimmeersut inissaq ataaseq unammissutigaat.
AAMMA ATUARUK Isikkamik arsaanneq: Illup iluani pissartanngorniunnissat akuerisaapput
Kugsak-45 aamma G-44 anngunniunnermi sapaammi unnukkut Aasianni naammassisumi finalemi unammisuupput. Piffissaliunneqartoq naammassippat tamarmik pingasoraarlutik naligiipput, taamaattumillu minutsit tallimat marloriarlugit unammeqqillutik.
- Tassanilu Kugsak-45 marlunnik isertitseqqipput G-44 isertitseqqinngitsut taamaalilluni Kugsak-45 5-3-mik ajugaalluni, arsaattartut kattuffiat KAK nalunaarpoq.
Bronzennanniunnermi T-41 Aasianneersut KB-84-mut Kangaatsiameersumut 7-1-mik ajugaavoq.
Avannaata Kommuniani aamma anngunniuttoqarpoq inissat marluk unammissutigineqarlutik.
AAMMA ATUARUK Futsal: KNI Cup GM-mut misiliineruvoq
Finale pissanganarsinngilaq, tassami Nagdlúnguak Ilulissaneersoq nunaqqataasunut 20-2-mik ajugaarujussuarmat.
Bronzennanniunnermi Qaanaaq Sport Clubimeersut aamma UB-83 Upernavimmeersut isaatitsilaavipput tassanilu UB-83 7-6-mik ajugaavoq.
Kommuneqarfik Sermersuumi anngunniunneq ullumi Nuummi aallartissaaq tassanilu pingasut anngutissapput.
Sapaatip akunnerata naanerani tulliuttumi Kommune Kujallermi anngiunniuttoqassaaq. KAK ilisimatitsivoq tassani iligiit ataatsit anngutissasut. Qeqqata Kommunianiit iligiit ataatsit aamma annguttussaapput.
