Futsal: B-67 qularnaatsumik ajugaavoq
Angutit inersimasut futsalimi GM-qarneranni Nuummi illorsuarmi timersortarfimmi sapaammi unnukkut finale pissanganarsinngitsoorpoq. Unamminerup aallartinneraniit B-67 Nuummeersoq aqutsisuuvoq illoqarfeqatitik IT-79 14-mik ajugaaffigalugit.
GM imatut naammassivoq:
1. B-67, Nuuk
2. IT-79, Nuuk
3. Aqissiaq, Maniitsoq
4. K-33, Qaqortoq
5. Nagdlúnguak, Ilulissat
6. Nagtoralik, Paamiut
7. I-69, Ilulissat
8. Kugsak-45, Qasigiannguit
Ukiup iligiivi:
Malik Hermarij, B-67
Phillip Holmene, B-67
Nick Reimer, B-67
Lars Erik Reimer, Nagdlúnguak
Hans Karl Berthelsen, IT-79
Akiuulluarnerpaaq:
Bastian Rosing, B-67
Arsalerillammak:
Hans Karl Berthelsen, IT-79
Arsallammak:
Phillip Holmene, B-67
Sukumiisumik piareerarneq suleqatigiilluarnerlu B-67-ip angusarissaarneranut aqqutissiuusseqataasut iligiit aquttuat Patrick Frederiksen ajugaanermi kinguninnguaq nassuiaavoq.
- Iligiinni ataqatigiilluartorujuuvugut. Sungiusarnitsinni aamma eqqartorparput iligiittut suleqatigiinneq pingaarnerutinniarlugu kiisalu isersimagaangatta pisinnaasarput tamaat tamaviaartarniarluta, Patrick Frederiksen KNR-mut oqarpoq.
B-67-mi arsartut arlallit siornatigut nunanut allanut unammisartuni peqataasarput aammalu ilimanarluni toqqarallakkat qanittumi nalunaarutigineqarpata arlallit aamma toqqakkat akornannikkumaartut.
AAMMA ATUARUK Futsal: I-69ip arnartai pissartanngoqqipput
- Nunanut allanut unammisartuniittunut piumasaqaataavoq sapaatip akunneranut arlaleriarluni sungiusartuartarnissaq aamma qasujaassutsikkut qaammatit tamaasa misilinneqartarlutik. Taamaattumik maanna qasujaannitsinnut tamanna iluaqutaaqaaq, Patrick Frederiksen oqarpoq.
Finalemi IT-79 arsarnissaminut periarfissinneqarpianngillat B-67-lu 14-0-mik ajugaalluni.
- Unamminerit maanna GM-mi pereersut isiginnaaqqinnikuuagut. IT-79 aamma ilisimalluarparput tamannalu finalemi aamma atorluarparput, Patrick Frederiksen nassuiaavoq.
Aqissiaq Maniitsumeersoq bronzennappoq bronzennanniunnermi K-33 Qaqortumeersoq 8-6-mik ajugaaffigalugu.