Frimærkit nunatsinneersut katersisatunit nuannaarineqartorujussuupput
Danmark frimærkinik Nunatsinneersunik niuerfiit pingaarnersaraat. Tele-Post taamaammat Københavnimi saqqummersitsinermut "Frimærke, Brev og Postkortmessen"-imut peqataavoq.
Hjørdis Vibergip, Tasiilami Filateliamik TPC-millu aqutsisup saqqummersitsinermi peqataanini nuannaraa:
- Takutitsinersuarmut peqataaneq misigisaavoq angisooq, Hjørdis Frederiksbergimi Nunatsinneersut nerriveqarfianni ulluni marlunni ulapissimaqisoq oqaluttuarpoq.
Kalaallit frimærkii katersisartunit soqutigineqarsimaqisut, taassuma oqaluttuaraa:
- Frimærkiutigut assut eqqumaffigineqarput, katersisartullu 2014-imi saqqummiunneqartunik nutaanik pisiniarlutik nerriveqarfitsinni utaqqisorpassuupput ullormiit aallartiffimmiit naammassinissap tungaanut, Hørdis Viberg oqaluttuarpoq.
Atuagaq nutaaq saqqummersinneqaqqammersoq "Tolv Grønlandsekspeditioner 1818 - 1978" aamma tuniniarneqarpoq.
Kalaallit Nunaannut ilisimasassarsioriartarnerit tusaamasat pingasut, allallu tusaamaneqannginnerusut qulingiluat atuakkiami oqaluttuarineqarput. Ilisimasassarsiornerit taakku Tele-Postip frimærkitigut nangeqattaartuliatigut malunnartinniarpai, siulliillu 2003-mi saqqummersinneqarlutik.
Jørgen Brønlund, Mylius-Erichsen aamma Høeg Hagen frimærkit kingulliit marluk takutippaat, 1906-imit 1908-p tungaanut Nunatsinni ilisimasassarsiorlutik Danmarks-Ekspeditionimik taallugu tusaamasaassumillu ilisimasassarsiornerat takutinneqarluni.
