Frimærki tusaamasaq
Tyskeq issittumi ilisimatusartartoq, 1930-mi toqusoq, Alfred Wegener, kalaallit nipitittagaatigut, tassa frimærkiatigut, assiliartaalluni qaammatip ataatsip matuma siorna saqqummerpoq. Nipitittagaq taanna tyskinit ilassilluarneqaqisoq, TELE Post nalunaarpoq.
Alfred Wegenerip nunamini ataqqisaalluarnera nipitittakkap ilassilluarneqarneranut minnerunngitsumik pissutaavoq, ilisimatusarfik aamma Wegenerimut atsiunneqarsimavoq.
Danmarksekspeditionimi oqaluttuassartaqaqisumi, ukiuni 1906-miit 1908-mut ingerlanneqartumi, Alfred Wegener inuusuttuunermini peqataavoq. Nunat imminnut ataqatigiissimaneri pillugit ilisimatusarsimanini uissuummiutigineqaqisut 1915-imi saqqummersippai.
Kalaallit nipitittagaataasa pitsaassusaat qaffasissuummata tyskit frimærkinik katersisartut nuannaarutigisaqaat. Katersisartutoqqat Kalaallit Nunaannit katersatik ilaqqippaat, katersilerlaallu Kalaallit Nunaannik nuannersumik aamma ilisimannilerput.
Frimærki POST Greenlandip tulliani saqqummersitassaa taaguuteqarpoq ”Galathea III”. Ilisimatusartoqartillugu qitiulluartartumi, umiarsuaaqqami alapernaarsuummi, VÆDDEREN-imi, septembarimi tamanna pissaaq.
