Frimærki tapiissutitalik tunisaalluarpoq

Aningaasat 150.000 koruunit, frimærkemik tapiissutitalimmik tuniniaanermit isertitarineqartut, tuberkulosemut akiuiniarnermut tapersersuinermut atorneqartussanngorput.
Allattoq Elisa Isaksen
novembarip 29-at 2010 06:27

Frimærkimik tapiissutitalimmik tuniniaanermit isetitat 150.000 koruunit

POST Greenlandip peqqissutsimut naalakkersuisumut Agathe Fontainimut ullumi checkinngorlugit tunniutissavai.

Frimærkemik tapiissutitalimmik saqqummersitsineq iluaqutaavoq, soorlu pisisartup frimærkimut ataatsimut 50 øremik akiliuteqarneruneratigut, siunertamut ajunngitsumut tapiisoqartarmat.

Aningaasat taakku nakorsaaneqarfimmut ingerlateqqinneqassapput, taakkumi Nunatsinni tb-mik akiuiniarnermik suliaqartuummata.

Frimærki eqqumiitsuliortumit Miki Jakobsenimit titartarneqartoq 2008-milu maajimi saqqummersinneqartoq, Nunatsinni Nunattalu avataani tunisaalluarsimavoq.

Frimærki immikkut tapiissutitalik, Nunatsinni tb-mik akiuiniarnermut tapersersuinermut atorneqartussaq saqqummersinneqarpoq.

Aningaasallumi atorfissaqartinneqarluarput. Qaammatini kingullerni Kujataani iluatsittumik paasisitsiniaasoqarpoq, tassa nunaqarfimmiut illoqarfimmiullu seqersillutik misissortinnissamut periarfissinneqarmata.