Frimærkeliullammak Nuummut tikeraartoq

Nuummi 5. klassini atuartut ullumi tamanna paasisaqarfigisinnaavaat, frimærkinik ilusilersuillunilu kigartuisartoq tusaamasaq, norgimiu, Martin Mørck, Nuummut tikippoq, taassuma kalaallit frimærkissaat nutaaq nalunaaquttap akunnerini marlussunni ilusilersorlugulu kigartussavaa, meeqqat isiginnaartuliullugit.

Martin Mørck frimærkinik 60-it angullugit amerlassusilinnik TELE-POST-imut ilusilersuillunilu kigartuisimavoq, frimærkili Kalaallit Nunaanneersoq Kalaallit Nunaanni aatsaavissuaq kigartorneqalerpoq.

Martin Mørckip Kalaallit Nunaat nuannarisorujussuuvaa, ilaatigullu frimærkiliarisimavai Dronning Margrethe kalaallisoortoq, Siriusikkut qimussersut, Kalaallit Nunaanni timmissat danskillu Tunumi ilisimasassarsiornerat. Kalaallit frimærkianni torrallataasa ilagaat ilisimasassarsiortumik Alfred Wegenerimik frimærkiliaa. Frimærki taanna ”Nunarsuarmi frimærkit kusanarnersat” akornanni normu 8-nngorpoq.

Meeqqat atuartut saniasigut Nuummi innuttaasut TELE-POST-imut ullumi nalunaaqutaq pingasut tallimallu akornanni alakkaasinnaapput.