Friis Arne Petersen Kaj Kleistilu ataatsimiittut

Allattoq Carla Davidsen
aggustip 22-at 2005 10:48

Nunanut allanut Danmarkimi ministereqarfiup pisortaa, Friis Arne Petersen aamma Namminersornerullutik Oqartussani pisortaaneq Kaj Kleist Nuummi tallimanngormat ataatsimiipput. Ataatsimiinnermi eqqartorneqarput nunanut allanut sillimaniarnermullu tunngassuteqartut, nunatsinnut Danmarkimullu attuumassutillit.

Danskit, kalaallit amerikamiullu suleqatigiinnerat ”Joint Commitee”, nunat avannarliit suleqatigiinnerat, EU/nunarput aammalu Naalagaaffiit Peqatigiinni nunap inuiiva pisinnaatitaaffiisa siuarsarneqarnissaat ilaatigut eqqartorneqarput.

Nunanut allanut ministereqarfimmi pisortap aamma ilisimatitsissutigaa Naalagaaffiit Peqatigiinni sillimanissamut ataatsimiititaliaanut Danmarkip ilaasortaanera nalilersorneqassasoq, aamma Naalagaaffiit Peqatigiit ungasinngitsukkut ataatsimeersuarnissaanut ilimasuutini.

Tartupaluk – Hans Ø – pillugu Canadap isumaqatiginninniarnissaa aamma paasissutissiissutigineqarpoq.

Nunanut allanut sillimanissarlu pillugit naalagaaffimmi ataatsimiititaliaq danskit kalaallillu ukiup affakkaarlugu ataatsimiittarnermut una ataatsimiinneq ilaaginnarpoq.