Freestylerluni sisorarneq perngaammik unammissutigineqassaaq

Freestylerlunilu sisorarneq Arctic Winter Gamesimi perngaammik ukiormanna ilaatinneqassaaq. Freestylemik sisorartartut pingasut Kalaallit Nunaannit peqataasussat, aputissaaleqisaraluarlutik unamminissamut sungiusarluarsimapput.
Allattoq Louise M. Kleemann
marsip 05-at 2010 05:53

Sisorartartut sungiusaasuat Jens Jakob Lennert-Sandgreen ima oqarpoq:

- Piareersarnissatsinnut iluamik periarfissaqarnikuunngilagut aputaasakkami. Kisianni ruujoriisatigut ammut sisunissamut pikkorissinikooqaat, tinngallattaarnermili qanoq ingerlassanersut suli nalunarpoq. Aamma Canadamiut qanoq pikkoritsiginersut naluarput, toqqissisimavungali, Jens Jakob Lennert-Sandgreen oqarpoq.

Freestylerluni sisorarneq Arctic Winter Gamesimi aatsaat ilaatinneqarmat angusat qanoq ikkumaarnissaat taassuma eqqoriarsinnaannginnerarpaa, unammeqataanissamulli erinisuppoq:

- Erinisuppugut. Freestylerluni sisorartarnerup Arctic Winter Gamesimi ilaatinneqalernissaa qangalili neriuutigisaratsigu peqataanissamut erinisuppugut, Jens Jakob Lennert-Sandgreen oqarpoq.

Issittormiut unammiuaarnerat, Arctic Winter Games 2010, Canadami nunap immikkoortuani Albertami Grande Prairiemi aqagu aallartissaaq, arfininngornermilu marsip 13-iani naammassineqassalluni.

Timersortartartut sungiusaasullu aqutsisullu allat katillugit 186-it Nunatsinniit peqataassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq