Freestylemik unamminermi kalaaleq peqataassaaq

Immikkut malittarisaqarani sisorarluni unammiuaarnermi, ”Freestyle”-mik taaneqartartumi, kalaallimik peqataasoqalerpoq. Hans-Jakob Brandt Olsen Freeski Openimi siorna peqataasoq, ukiormanna aamma peqataasussanngoqqippoq.
Allattoq Louise M. Kleemann
februaarip 16-at 2010 09:33

Unammiuaarneq Schweizimi marsip pingajuaniit arfernata tungaanut ingerlanneqassaaq.

Hans-Jakob Brandt Olsen qallunaat peqataatitaannit siullersaalluni semifinalimut siorna annguppoq, normu 33-mut inissilluni. Tassa nunarsuarmi pikkorinnerit akornannut inissilluni.

Hans-Jakob Brandt Olsen ”Slopestyle”-mi unammeqataassaaq, tassani sisuffissaq assigiinngitsunik pissitassartalik sisuffigissallugu. Sisorartartut periusaat nalunassutsinillu assigiinngitsunik atuisinnaassusaat nalilersuinermi tunngavigineqassapput.

- Freestylemik unammiuaarnermi peqataasussat 100-t allatsissimapput. Anngunniunnermi siullermi 24-t semifinalimut ingerlaqqissapput, Kalaallit Nunaannit Sisorartartut Peqatigiiffiata ataani Freestylemut ataatsimiititaliami siulittaasoq Jens Olsen oqaluttuarpoq.

Anngunniutivinnermi pitsaanerit aqqaneq-marluk pissartanngorniullutik unammissapput.

Hans- Jakob Brandt Olsen ”Slopetyle”-mik unamminermi Danmarkimi pisartanngoqqammerpoq, aamma USA-mi Coloradomi januaarip qaammataa tamaat atorlugu sisorartartut pikkorinnerit peqatigalugit sungiusarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq