Fredericiamiinneq sivitsorpoq arsakut qullaammata
Angajoqqaarsiaasut sapaammi unnukkut sianerfigiortorneqarput Air Greenland nalunaareersoq ataasinngornermi Kangerlussuup Københavnillu akornanni timmisartuussinissaq taamaatillugu.
Iluliarmiuaqqat 32-it martsip naaneraniit Fredericiameereerlutik ataasinngornermi angerlartussaagaluarput. Sapaammili tassa sianerfigineqarput angerlarnissaat kinguartinneqarallartoq.
- Ilaat angerlarsersimagamik kalerrinneqaramik pakatsisimapput. Aammali meeqqat ilaat nuannisarsimanermut qungujullutik kalerriutigineqartoq tigusimavaat, meeqqat Fredericialiarneranni ataqatigiissaarisoq Inger Degn KNRimut oqaluttuarpoq.
Iluliarmiuaqqat Fredericialiartarnerat 1960-ikkunnili ingerlavoq tamannalu ullumikkumut atorneqartarpoq meeqqat qallunaatut ilikkarniarnerat ikorfartorniarlugu. Ilulissat aamma Fredericia illoqarfittut ikinngutigiipput taamalu suleqatigiinneq aamma atuarfeqarnermut atatillugu inerisarsimallugu.
Ualimut tallimanut ilisimatitsisoqaqqikkumaartoq nalunaarutigineqarpoq.