Franskit sorsuutaat Nuummut tikeraassaaq
Tikeraarneq paasisitsiniaanermut ”Store Nord 2008”-mut ilaatinneqarpoq, tamannalu franskit sakkutuuisa imarsiortut ukioq allortarlugu ingerlattaraat, nunatsinni franskit konsuliata Ole Marquardtip ilisimatitsissutigaa.
Sorsuut Nuummeereeruni juuni aallartilaarpat Islandimut Reykjavikiliassaaq, juunilu qiteqquppat Ruslandimut Severomorskiliassaaq juunillu naalernerani Norgimut Stavangeriliassalluni. Franskit sorsuutaata angalaneratigut imarsiornikkut suleqatigiinneq siuarsarniarneqarpoq kiisalu Frankrigip nunanik avannaaniittunik ikinnguteqarnera nakussassarniarneqarluni.
”Tourville” Reykjavikip avataani umiarsuaq nakkutilliissut ”Vædderen” peqatigalugu immami annaassiniarnermik sungiusassaaq.
Pisarneq malillugu illoqarfimmi ”Tourville”-p tikeraarfigisaani innutaasut, sorsuummut takornariarnissaminnut periarfissinneqassapput. Nuummiut maajip 24-anni aamma 25-anni takornariarsinnaassapput.
