Franskit ministeriat eqqartuussivimmut tunniunneqarpoq

Utoqqalinersiutinut inatsimmik allanngortitsiniaraluarpoq nuannarineqanngeqisumik, ataasinngormallu ministerit allanngorneranni soraarsitaavoq, maannalu atorfimminik atornerluisimasutut eqqartuussivimmut sassartinneqalerluni.

- Missingersuusiornermut ministeriuvunga suliffissaqartitsinermullu ministeriullunga sunniuteqarluartoq, Eric Woerth-ip ministeriaqarfini tullersortiminut tunniunnerani taama oqarpoq.

Immaqa sunniuteqarluarpallaarsimavoq, naalagaaffiup unnerluussisuata rigsrettimi Eric Woerth-ip eqqartuunneqarnissaa aallaavigalugu misissuisoqarnissaanik piumasaqarpoq.

Eric Woerth kammalaatersorsimasutut namminerlu soqutigisaminik unioqqutitsilluni salliutitsisimasutut pasineqarpoq.

Eric Woerth-imi, franskit politikerii amerlanerit allat assigalugit, kommunemi mikisumi borgmesteritut saniatigut atorfeqarpoq.

Kommunemi tassani pangallussilluni sukkaniuttarfiup ukiut arlaqanngitsut matuma siornagut sukkaniuttarfiup nunataa pisiariumallugu naalagaaffimmut qinnuteqarsimavoq, nunali orpippassuaqarfimmiimmat itigartinneqarsimalluni, naalagaaffiummi orpippassuaqarfinni nunat tuniniaqqusaanngimmagit.

Woerth-ili missingersuusiornermut ministerinngormat orpippassuaqarfik, pangallussilluni sukkaniuttarfittalik golfertarfittalillu, 57 hektarisut angitigisoq, politikikkut kammalaatiminut pangallussilluni sukkaniuttarfiup siulersuisuiniittunut, 20 million koruunilersillugu, akiviata qulerarterutaannaa, tuniniarneqarnissaa akuerisimavaa.

Taassumallu saniatigut suliassat allat utaqqipput. Bettencourt pillugu eqqartuussinermi uppernarsaasoq oqaluttuarpoq millionærip Liliane Bettencourt-ip Sarkozy-p 2007-imi qineqqusaarneranut aningaasanik 150.000 euronik Eric Woerth-imut tunniussisimasoq. Eric Woerth taamani Sarkozy-p partiani, UMP-mut, aningaaserisuusimavoq.

Eric Woerth eqqartuunneqarnini isumaginiassammagu soraarsissimallugu, Præsident Sarkozy ippassaq oqarpoq.

- Tamanut ajunnginneruvoq Woerth-i eqqartuunneqarnermi nalaani naalakkersuisunut ilaanngippat, Sarkozy oqarpoq, ilanngullugulu:

- Tamakkua isumakuluutigiunnaarpagit neriuutigaara suleqatigeeqqissinnaassalluta.