Franskit inatsimmut nutaamut akerliussutsimik takutitsisut
Inuit tusintilikkuutaat inatsimmut nutaamut politiinik assilianik siammarterinissamut pinngitsoortitsisussamut akerliussutsimik takutitsinissaat ilimagineqarpoq.
Angut taartumik amilik qanermut assiaquteqannginnami politiinit arlalinnit amiata qalipaataa pillugu nikassarneqaatigaluni persuttagaasoq pillugu videoliap saqqummersinneranit ullut arlaqanngitsut qaangiuttut akerliussutsimik takutitsisoqarniarpoq.
Inatsimmi nutaami immikkoortortaq 24-mik taaneqartartoq isummanik akerleriiffiunerpaat ilaanniippoq. Tamatuma politiinik assilianik "politiit innarligassaannginnerannik" akornusiiniarluni saqqummersitsinissaq inerteqqutinngortippaa.
Assilianik saqqummersitsisut ukiumi ataatsimi paarnaarunneqarsinnaassapput 45.000 euronillu, 335.000 koruunit missaanniittunik, akiligassinneqarsinnaassalluni.
Parisimi illoqarfinnilu annerni allani akerliussutsimik takutitsisoqarnissaa naatsorsuutigineqarpoq.
