Franskit akerliussutsimik takutitsisut 100.000-likkaat

Frankrigimi inuusuttut suliffimminnit ajornannginerusumik soraarsinneqartalernissaannik, naalakkersuisut inatsissatut siunnersuutaat akerliufigalugu, innuttaasut 100.000-ilikkuutaat ullumi ingerlaaqatigiissutigiipput. Tamatuma kingorna naalakkersuisooqatigiit avissaariartulerput.

Frankrigimi inuit ikittunnguakkuutaarlutik nilliasut amerliartuittunik ingiorteqaleriartuaannguarlutik illoqarfinni 100-ni 100.000-ilikkuutaanngorput. Inuusuttut suliffittaartartut ajornannginnerusumik sulisitsisunit soraarsinneqartalernissaata naalakkersuisunit inatsisissatut siunnersuutigineqarnera akerliuffigalugu nillerrattarput.

Frankrigimi inuusuttut kattuffiillu siunnersuut akuererusunngilaat suliffissaqarnerullu qulakkeerneqarnissaa pingaarutilerujussuuvoq allaat allannguiniarnerit ajornakusoortorujussuusarlutik.

Akerliussutsimik takutitsisut nipilersuuserlutik eqqissisimaaqalutik ingerlaaqatigiipput. Politiit ingerlaaqatigiittunut akuliutsinneqarsimanngillat, eqqissisimaruttormata. Ingerlaaqatigiinnermi aaqqissuisut nalunaarput inuit millionilikkuutaat ingerlaaqatigiissimasut, tusagassiorfiilli tusarliussipput inuit 100.000-ilikkuuttaat peqataasimassasut.

Inuppassuit akerliussutsimik takutitsineri naalakkersuisooqatigiinnermut malunniukkiartulerpoq. Naalakkersuisut siuttuat nunallu iluani pissutsinut ministeri isumaqatigiikkunnaariartorput.

- Allannguiniarnermi oqaloqatigiinnissaq pisariaqarpoq, taama nunap iluani pissutsinut ministeri oqarpoq nangipporlu naalakkersuisut siuttuata tamanna nalunnguatsiarpaa.

Jacques Chiracip kinguaatissaattut angutit taakku marluk imminnut isigipput.