Frankrigip nunasiaateqarnerata oqaluttuarisaanera: Macron eqqaaniaanermut peqataasoq

Franskit præsidentiat inuit politiinit Parisimi 1961-imi toqorarneqartunut ullumi arfininngornermi eqqaaniaanermut peqataassaaq.
Franskit Algeriamik nunasiaateqarnerannut akerliussutsimik takutitsisut politiinit ukiut 60-it matuma siorna toqorarneqartut eqqaaniarneqarnerannut Emmanuel Macron Frankrigimi siuttuni siullersaalluni ullumi arfininngornermi peqataassaaq. Assi © : Ludovic Marin/AFP/Ritzau Scanpix
Allattoq Ritzau
oktobarip 16-at 2021 14:57

Franskit Algeriamik nunasiaateqarnerannut akerliussutsimik takutitsisut politiinit ukiut 60-it matuma siorna toqorarneqartut eqqaaniarneqarnerannut Emmanuel Macron Frankrigimi siuttuni siullersaalluni ullumi arfininngornermi peqataassaaq.

1961-imi oktobarip ulluisa 17-ianni pisut franskit oqartussaasuinit ukiuni qulikkuutaani nipangersimatinniarneqartarput, toqutaasullu qanoq amerlatiginersut suli ilisimavinneqarnani. Inuit hunnorujukkuutaat taamani toqunneqartut ilisimatusarnermik ilisimatusartorpassuit isumaqarput.

Frankrigip sakkortunerujartortumik nakuusertarnikkut Afrikap avannarpasissuiani nunasiaminik aqutsiinnarniarsarineranut akerliussutsimik taamani takutitsisoqarpoq.

Algeriap namminiilivinnissaanik tapersersuisut taamani qaartartumeerisarmata, pissutsit aamma Frankrigimi sakkortupput. Frankrigip pisortatigoortumik sinniisai qaartartumeerneqarniarsarisarnikuupput.

Macron pisortatigoortumik ukiut 60-inngorfimmut malunnartitsinermut Parisip avataatungaani naatsiiviliarsuarmi toqutaasunut eqqaaniaanermut ullumi ualikkut prqataassaaq.

Præsidenti nutaaliamik atassuteqarnissamut Frankrigillu nunasiaateqarsimaneranut allatut isiginnilernissamut sulissuteqartoq Parisip politiivisa 1961-imi oktobarip ulluisa 17-ianni iliuusaannut pisortatigoortumik utoqqatsissuteqassanersoq maanna nalunarpoq.