Frankrigip avannarpasissortaani sissat ilaat matoqqittut

Franskit nunaminni sissat coronavirusip ajornartoortitsinerani malittarisassanut soqutigittaattunik innupallaarnissaat aarlerigivaat.
Frankrigip avannamut kippasissortaani illoqarfiit assigiinngitsut sissat nalunnguartarfiit ullualuinnaat ammatereerlugit matoqqippaat, inuit qanillivallaannginnissartik ataqqinnginnamikku. Assi © : Stephane Mahe/Reuters/Ritzau Scanpix
Allattoq Ritzau
maajip 20-at 2020 15:09
Nutserisoq Mads Lynge

Frankrigip avannamut kippasissortaani illoqarfiit assigiinngitsut sissat nalunnguartarfiit ullualuinnaat ammatereerlugit matoqqippaat, inuit qanillivallaannginnissartik ataqqinnginnamikku.

Bretagnep Atlantikumut sineriaani sissat nalunnguariartarfiit coronap ajornartoortitsilernerani qaammatit marluk matuma siornatigut matuneqarput, tamaanili innuttaasut ilaat atorfilittanut saaffiginnissimapput sissat matoqqinneqarnissaat kissaatigalugu.

Innuttaasut naapertuilluanngitsuliornerarlugit sissat nalunnguartarfiit pingasunngornerup unnukkuani atuutilersumik matoqqinneqarnissaat tamaani oqartussat aalajangerpaat.

AAMMA ATUARUK Frankrigimi coronaviruseqarnerani killilersuineq sivitsorneqartoq

Sissat nalunnguartarfiit hunnorujulikkaat arpattartunut, nalunnguariarniartunut nallukkianullu Frankrigip ammaqqikkiartuaarneqarneranut atatillugu sapaatip-akunnerata naanerani ammaqqinneqarput.

Sissanili amerlanerni palersaariartoqaqqusaanngilaq, coronavirusillu tuniluutilertoqqinnginnissaa pillugu inuit imminnut qanillivallaaqqusaanngillat.

Inuit 10.000-iikkaat inuiaqatigiinni matoqqatitsisoqarnerani annaanneqarsimasut Frankrigimi naalakkersuisut oqaatigaat.

Frankrigimi coronavirusimik toqquteqartut maanna 28.000-it sinnilaarpaat.