Frankrigip aningaasaqarnini pitsanngorsarnialerpaa

Frankrigimi aningaasatigut ajornartoorneq ingalassimaniarlugu, naalakkersuisut suliniutinut assigiinngitsunut aningaasaliinissamut pilersaarutaat 195 milliardi koruuninik nalilik, præsident Nicolas Sarkozyp ullumi saqqummiuppaa.
decembarip 04-at 2008 09:22

Aningaasarsiornikkut kinguariartorneq annikillisarniarlugu, nunat EU-mut ilaasortaasut arlallit tama ilioreersullu, naalagaaffiup karsia Frankrigimit taamaalilluni ammarneqarpoq.

- Aningaasaqarnikkut ajornartorsiorneq suliniutinut assigiinngitsunut aningaasaliinikkut qaangerluarneqarnerusinnaavoq, taamatummi iliorneq aningaasarsiornikkut siuariartornermik suliffissanillu nutaanik pilersitsinermik aqqutissiisarmat, franskit præsidentiat oqarpoq.

79 milliardi koruunit, nunap atortulersugaaneranut pitsanngorsaanermut, ilisimatusarnermut Frankrigimilu piffinni assigiinngitsuni oqartussaasut ikiorsernissaannut atugassatut immikkoortinneqarput.