Frankrigimit utilerpoq

juunip 15-at 2006 16:55

Kalaaleq assammik arsarluni nunanut allanut unammisartoq, Jakob Larsen, Frankrigimi ukiuni marlunni unammisartooreerluni Danmarkimi Fynip kujataani klubbiminut, GOG-mut, uteqqilerpoq.

31-nik ukiullip GOG-mut uteqqinneratigut assammik arsallaqqissumik, timikkut piginnaaneqarluartumik, qasujaatsumik illersuinerni peqalissaagut, Champions League-mut piareersarnerni tamanna atorfissaqartinneqarpoq.

- Assammik arsartarnitsinni Jakob Larsen nukittorsaatigissaqaarput, aamma kisianni akunnitsinni timikkut tarnikkullu iluaqutigissaqalutigu, GOG-mi sungiusaasuuneq, Carsten Albrecktsen, Fynimi aviisimut, Fyens Tidende-mut, ullumi oqarpoq.

Jakob Larsen aviisimut oqarpoq, soorlumigooq tassa angerlaliinnallarluni.

- Fyn angerlarsimaffimma aappaatut misigissuseqarfigaara, nunat assigiinngitsut unammineranni Kalaallit Nunaaat sinnerlugu 64-eriarluni peqataasarsimasoq, Jakob Larsen oqarpoq.