Frankrigimi 1975-imi naartuersissinnaasoqalerpoq.Assi: Christophe Archambault/AFP/Ritzau Scanpix

Frankrigimi politikerit naartuersissinnaanerup inatsisitigut illersugaalernissaa kissaatigigaat

USA-mi eqqartuussiviit qullersaat naartuersissinnaanerup inatsisitigut illersugaanerata atorunnaarsinneqarnissaanut aalajangereersorlu, Frankrigimi inatsisartut naartuersissinnaanerup nunap tunngaviusumik inatsisaa tunngavigalugu periarfissaalersikkusuppaat.

Naartuersissinnaanerup nunap tunngaviusumik inatsisaa tunngavigalugu periarfissaasinnaanissaanut inatsisissatut siunnersuut, Frankrigimi inatsisartuni amerlanerussuteqartut tapersersorpaat.

Franrkigimi nutaarsiassaqartitsivik AFP taama allappoq.

Naartuersissinnaanerup inatsisitigut illersugaanerata atorunnaarsinneqarnissaanik USA-mi eqqartuussiviit qullersaata ullualunnguit matuma siornatigut aalajangereeraalu Frankrigimi taama pisoqarpoq.

Naartuersissinnaanerup nunap tunngaviusumik inatsisaa tunngavigalugu periarfissaasariaqartoq, Frankrigip præsidentiata Emmanuel Macronip qisuariaatitut inatsisartuni siunnersuutigaa.

Frankrigimi naalakkersuisut siunnersuutaat, partiit inatsisartuni ilaasortaatitaqartut saamerlerneersut siuttuisa tapersersorpaat.

AAMMA ATUARUK USA-mi Demokraatit naartuersissinnaatitaaneq inatsisinut ilanngutsikkusuppaat

Frankrigimi 1975-imi naartuersissinnaasoqalerpoq.

USA-mi arnat naartuersissinnaaneq 1973-imili pisinnaatitaaffigilerpaat. Pisinnaatitaaffilli taanna eqqartuussiviit qullersaannit sapaatit akunnerata siuliani tallimanngormat tassa atorunnaarsinneqarpoq. USA-mi naalagaaffiit tamarmik immikkut maanna pisinnaatitaaffeqalerput, naartuersissinnaaneq killilersorneqassanersoq inerteqqutigineqalersinnaassanersorluunniit namminneq aalajangersinnaanngorlugu.

Naartuersissinnaanermut inatsisit USA-mi naalagaaffiit 50-iusut akornanni affaasa missaannit sukateriffigineqarnissaat maanna naatsorsuutigineqalerpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl