Frankrigimi inuusuttut piumasaat anguneqarpoq

Frankrigimi præsidentip Jacques Chiracip inuusuttut ajornannginnerusumik soraarsinneqarnissaannik inatsisissatut siunnersuut tunuartippaa. Sulisartut Kattuffiata ilinniartullu ajugaasutut imminnut isigipput, taamaakkaluartoq suliumajunnaarnerit akerliullunilu ingerlaaqatigiinnerit unitsissanerlugit suli aalajanginngillat.

Frankrigimi naalakkersuisooqatigiit inuusuttut 26-t inorlugit ukiullit ajornannginnerusumik soraarsinneqartarnissaannik siunnersuut tunuartinneqaraluarluni suliniutinik allanik taaserneqarnissaanik nalunaaruteqarneq unititsisoqannginneranut peqqutaavoq. Frankrigimi inuusuttut 20 procenti angullugu suliffissaaleqisuupput. Illoqarfiit amerlasuut tamatuminnga ukiarmi eqqorneqarput. Inatsisissatut siunnersuutip tunuartinneqarnera tamaalilluni ministeriunermut sakkortuumik kinguneqartussanngorpoq. Taanna Frankrigimi aappaagu qinersisoqareerpat præsidentip malitsissaatut imminut takorloortarpoq, maannali tamanna ilimagisinnaajunnaarpaa.

Frankrigimi naalakkersuisooqatigiinnik isornarsiuisartut arlallit de Villepenip tunuarniuteqarnissaa ilimagaat. De Villepenip inatsisissatut siunnersuummi tunuartinneqarnera suli eqqaanngilaa oqartarlunilu innuttaasut siunnersuutip siunertaanik paatsuisimasut.

Frankrigimi sulisitsisut inuusuttunik 26-t inorlugit ukiulinnik sulisoqarnissaminnut taperneqartalissapput tamanna inuusuttut ikinnerpaamik 159.000-it iluaqutigissagaat ilimagineqarpoq. Taamaakkaluartorli naalakkersuisooqatigiit amerlanerusunik suliniutinik aallartitsisariaqassapput inuusuttut suliffissaaleqisut ikilisarneqarniassammata.

Inatsisissatut siunnersuut tunuartinneqaraluartoq naalakkersuisooqatigiit massakkut suliniutinik aallartitsinissaat isornartorsiuisartunit ilimagineqanngilaq. Frankrigimi præsidentimik aappagu qinersisoqartussaanera tamatumunnga tunngavilersuutigineqarpoq.