Frankrigimi aqqusinermi akersuuttoqarnerani politiit 123-t ikilerneqartut

Frankrigimi naalagaaffimmi pissutsinut ministeri ippassaq sisamanngornermi nalunaarpoq, Frankrigimi aqqusinermi akersuuttoqarnerani politiit 123-t ikilerneqarsimasut inuillu 80-it tigusarineqarsimasut.

Frankrigimi nuna tamakkerlugu illoqarfinni assigiinngitsuni akerliussutsimik takutitsisoqarnerani akerliussutsimik takutitsisut katillugit 1,1 millionit missaanniipput.

Parisimi politiit gassi qulliliornartoq akerliussutsimik takutitsisunut qernertunillu atisalersorsimasunut atortariaqarsimavaat, nunalli ilaani illoqarfinni allani inuit 100.000-likkaat præsidentip Emmanuel Macronip utoqqalinersisalernissap ukiutigut qaffanneqarnissaanik pilersaarutaa pillugu eqqissisimanerusumik akerliussutsimik takutitsipput.

Akerliussutsimik takutitsinersuaq ullut qulingiluassaanik maanna pisoq qimuttuitsut timmisartullu angallannerinut kalluaaqaaq, aammalu ilinniartitsisorpassuit allallu ilinniagartuutut suliallit suliaminnik unitsitsillutik.

Taama aalassanneq pilerpoq, utoqqalinersiaqalertarneq ukiutigut ukiunik marlunnik qaffaavigineqarnissaa pillugu aaqqissuussineq saqqummiunneqarmalli, siornatigummi 62-inik ukioqaleraangamik utoqqalinersisaraluarput maannali tassa 64-inik ukioqalernermut qaffatsinniarneqarluni.

Parisimi akerliussutsimik takutitsineq sumiiffiit ilaanni eqqissisimakannersumik pigaluartoq, inuit ilai ikinnerussuteqartut naalagaatsuuniarlutillu inatsisaatsuuniartut eqqissiviilliornermik pilersitsipput, taakkumi pisiniarfiit igalaavinik, illoqarfiup iluata pisataaanik, McDonaldsillu neriniartarfiinik aserortereqaat.

Taakkuuppullu tassa politiit gassimik qulliliornartumik qaartartunillu igeruttakkanik tupatsitsiniutinik eqqarfigisaat.