Frank Jensenip Hans Enoksen naammagittaqquaa
Namminersorneq pillugu isumalioqatigiissitap aningaasarsiorneq pillugu suleqatigiissitaani siulittaasoq Frank Jensen isumaqarpoq, Naalakkersuisut siulittaasuata tusagassiutitigut tusarliinera inissaminiinngitsoq, Hans Enoksenilu naammagittarallartariaqartoq.
-Isumalioqatigiissitami sulinitta inernissaa qanittuararsuuarput, taamaammallu illuatungeriit tamarmik eqqissisimasariaqarput aamma isumalioqatigiissitami toqqaannartumik ilaasortaanngikkaluit. Soorunami naalakkersuisut siulittaasuata sulinerput qanimut soqutiginnilluni malinnaaffigaa, naammagittartariaqarporli sulinerput naammassitsiillugu, Frank Jensen taama oqarpoq. Taanna aperineqarniaraluarami naalakkersuisut siulittaasuata uparuaanera isertitassat annertunersaat, danskit naalagaaffiannut tuttussanngornerannut qanoq isumaqarnersoq, qalliinnarluni Frank Jensen ima oqarpoq,
- tamanna oqaaseqarfigissagaluarukku isumalioqatigiissitami isumaqatiginninniarnerit ingerlanneqartut KNR-ikkut ingerlalissapput, naalakkersuisut siulittaasuat ataatsimiitsitaliarsuarmi ilaasortaanngilaq, uangali ilaasortaavunga, akussaaffigaaralu suliatta torersumik inaarneqarnissaa. Taamaammat naalakkersuisut siulittaasuata KNR-ikkut tamanut saqqummiussaa uani oqaaseqarfigerusunngilara, Frank Jensen oqarpoq.
Frank Jensenip suliaq naammassereerpat oqallisiginissaa ammaffigilluinnarlugu oqaatigaa, naatsorsuutigaalu ungasinngitsukkut suliaq naammassineqassasoq.
