Frank Jensen: Isornartorsiuinerit tunngavissaqanngillat!
Kalaallit Nunaannit Namminersorneq pillugu isumalioqatigiissitap aningaasaqarneq pillugu sulinerata danskinit kinguarsarniarneqarneranik oqalunneq tunngavissaqanngilaq, isumalioqatigiissitami aningaasaqarneq pillugu siulittaasoq socialdemokratineersoq Frank Jensen isornartorsiuineq pillugu taama oqarpoq.
- Kalaallit Nunaata siunissaa pillugu sulinerput pingaarutilerujussuaq pisariaqanngitsumik avissaarutigisariaqanngilarput, Folketingimi inatsisartunilu ilaasortap Kuupik Kleistip ippassaq danskit Namminersorneq pillugu isumalioqatigiisitami ilaasortaasa isumalioqatigiissitami sulinertik tunulliukkiartulersimagaat isornartorsiuineranut akissuteqarluni Frank Jensen taama oqarpoq. Isumalioqatigiissitami pingaaruteqartumik aningaasaqarnerup eqqartorneqarnissaata arlaleriarluni unitsinneqartarsimanera kinguartinneqartarsimaneralu Kuupik Kleistip isornartorsiuinerminut tunngavilersuutigaa.
Frank Jensenip nassuerutigaa isumalioqatigiissitap ataatsimiinnissai arlaleriarlutik kinguartinneqartarsimasut.
Namminersorneq pillugu isumalioqatigiissitami ilaasortat pingasut Folketingimi inuussutissaqarnermut ataatsimiititaliaani aamma ilaasortaapput. Taamaattumik inuussutissaqarnermut ministeri Lars Barfoedi qanittumi ilungersornartorsiulermat ilaasortat taakku pingasut Danmarkimiiginnarniarlutik aalajangersimapput. Tamanna Frank Jensenip ajuusaarutigaa:
- Kialuunniit naatsorsuutigisimanngilaa Danmarkimi inuussutissat pillugit ilungersunartorsiortoqarnissaa. Ajuusaarutigaara tamatuma isumalioqatigiissitami sulinerput eqqorsimammagu, Frank Jensen taama oqarpoq.
Namminersorneq pillugu isumalioqatigiissitami siulittaasup Jonathan Motzfeldtip ilaasortat tamatuminnga eqqartueqatiginiarlugit ippassaq nalunaaruteqarpoq ullumilu isumalioqatigiissitami ilaasortat allaffigai pilersarutit malillugit ataatsimiittarnissartik siulittaasoqarfimmit naatsorsuutigineqartoq.
Ataatsimiiffissallu malinneqarnissaat Frank Jensenip neriorsuutigaa.
