Ilisimatooq: Nunarput Naalagaaffeqatigiinni issittoq pillugu oqaaseqartartunngorpoq
Issittumi Siunnersoqatigiinni ataatsimiittoqarnerani nunarput oqaaseqartussanngorlunilu ingerlatsisussanngorpoq.
Tamanna naalagaaffeqatigiit Københavnimi sisamanngornermi ukiumoortumik ataatsimiinneranni aalajangerneqarpoq.
Isumaqatigiissut nutaaq nunatsinnut pingaaruteqarluinnartoq, Marc Jacobsen oqarpoq.
AAMMA ATUARUK Nunarput Savalimmiullu Issittumi Siunnersoqatigiinni pingaaruteqarnerusumik inissisimalissasut
Taanna Cambridge Universititimi nunani issittormiuni nunat tamalaat akornanni politikki pillugu ilisimatuujuvoq.
- Danmarkip Kalaallit Nunaannik pinngitsuuisinnaannginneranut una assersuutissaqqippoq. Danmarkip nunani allani politikkimik ingerlatsinermi pissaaneqarniarnermi Kalaallit Nunaat atorsinnaagaa ukiorpassuarni eqqartorneqartarpoq. Maanna Kalaallit Nunaata Issittoq atorluarlugu oqaaseqarnerusinnaalersoq oqaatigineqarsinnaavoq, Marc Jacobsen oqarpoq, nangilluni:
- Tassa nunani allani politikkimut tunngassuteqartuni, pingaartumillu issittoq pineqartillugu Kalaallit Nunaat siuttutut inissisimalerpoq. Isumaqatigiissummi imaalerpoq Kalaallit Nunaat siulliulluni oqaaseqartartussanngortoq, siulliullunilu atsiortalissalluni. Taava Savalimmiut Danmarkilu kingulliusalissallutik.
Takussutissaq pingaaruteqartoq
Marc Jacobsenip oqarnera naapertorlugu Naalagaaffeqatigiinni ilaasortat pingasut Issittumi Siunnersoqatigiinni eqqartugassanik suli taaseqatigiittartussaapput.
Oqaaseqartartussatullu siullertut inissinneq isumaqarluinnarpoq.
- Oqaaseqaqqaartoq tassaasarpoq oqaasissaqartitaanerusoq. Imaasinnaavoq pingaaruteqanngitsutut nipeqartoq, kisianni nunani tamalaanni politikki pineqartillugu pingaaruteqartorujussuuvoq.
Talerpianit Naalakkersuisut siulittaasuat, Múte B. Egede,qeqqani ministeriuneq Mette Frederiksen aamma saamerlermi Savalimmiuni lagmandi Bárður á Steig Nielsen ippassaq tusagassiortunik katersortitsinermi. Assi: Scanpix
Issittumi nunat ataatsimeeqqinnissaannut Kalaallit Nunaata Savalimmiullu namminneq erfalasortik atimillu allagartaat nerrivimmiittuutigissaneraat, Marc Jacobsenip pissanngatigaa.
Nunammi nammineernerusutut allanit ataqqineqarnissaannut tamanna pingaaruteqarluinnartoq taassuma nassuiaatigaa:
- Nunat avatangiisit Kalaallit Nunaat nunanut allanut tunngasuni politikkimi nammineernerusutut isigilerunikku taava Københavnimut sianeratik Nuummut immaqa sianeqqajaanerussapput.
- Taava kalaallit nunatta sunniuteqarfiginerusaanik isumaqatigiissusiortoqarsinnaanngorsinnaavoq. Tassalu takussutissaasunik iliuutsit nalikinaagassaanngilluinnarput, Marc Jacobsen oqarpoq.
AAMMA ATUARUK Múte Marienborgimi: Nunanut allanut tunngasuni sillimaniarnermilu oqaasissaqarnerorusuppugut
Issittoq pillugu periusissaq nutaaq nunatta isumaqatigiissutit ilaanni salliuffigilersinnaagaa, Marc Jacobsen isumaqarpoq.
Issittormi pillugu periusissaq ukiup nikinnerani atorunnaarpoq, taannalu suli nutarterneqarani.
- isumaqatigiissut nutaat issittoq pillugu nutaamik pilersiusissiaqalernissatsinnut alloriarnerunersoq takunissaa pissanganarpoq. Taamaattoqarsinnaavoq, Marc Jacobsen oqarpoq.