Imigassaq: Fontainip angajoqqaat akisussaaffimmik tigusitinniarai

Periuserineqartoq Planet Youthimik ateqartinneqartoq, Islandimi ineriartortinneqarpoq. Ilusilernerani ukiumootumik meeqqat inuusaasiat pissusilersuutaallu misissuiffigineqartarput, kingornatigullu atugassarititaasut allallu pissutsit pingaaruteqartut pitsanngorsarneqartarlutik.

AAMMA ATUARUK Islandimi imigassamik pinaveersaartitsineq iluatsilluartoq nunatsinni atussasoq

Peqqinnissamut Naalakkersuisoq Agathe Fontain Ilinniartitaanermullu Naalakkersuisoq Doris J. Jensen Planet Youth pillugu ilisimasassarsioriartorlutik Islandimeeqqammerput. Angalanerminni arlalinnik ilikkagaqarput, taakkulu nunatsinni atugassarititaasunik pitsanngorsaanermut maanna atorneqassasut, Agathe Fontainip oqaatigaa.

- Uani imminnut suleqatigiinneq, sunngiffimmi susassaqartitsiniarnerit tamakkulu akeqanngitsumik ingerlanneqartarnissaat aamma ingerlassimavaat.

Taakkorpiaallu Agathe Fontainip nunatsinni kulturikkut inuiaqatigiinnilu Islandimiit allaanerussuteqaraluarluta atulersissinnaagigut isumaqarpoq. Matumani ukiumoortumik misissuisarnit ilisimalikkat inerniliisarput, nunatsinnilu arlarniutissat marluk eqqaallugit.

- Siullermik isumaqarpunga, Islandimiutulli, angajoqqaat akisussaaffimmik aamma tigusinissaat, aamma siunissamik tigumminnittuaannarnissaat, annertuumik sulissutigineqartariaqartoq.

Pisortat suliffeqarfiisa assigiinngitsut suleqatigiittarnerat aamma pitsanngorsarneqassaaq.

- Uagut qanoq iliuuseqarniarutta suleqatigiinnissarput pingaartorjussuuvoq.  Minnerunngitsumik kommunit taakkuusariaqarput aamma peqatissagut. Aamma taamaammat taakkua suleqatiginissaannut piareersaasariaqarpugut, Agathe Fontain oqarpoq.

Islandimi periuserineqartup ilaa nunatsinni ukiumit nutaamiit atulerniarneqalereerpoq.

- Borgmesterit januaarip naalernerani naapittussaavavut.  Taava neriupppunga tassuunakkut periarfissaqarumaarlunga. Kisianni soorunami oqaloqatigeqqaartariaqassavakka.  Agathe Fontain naggasiivoq.