Inuiaat piginnaasaat atorluarneqartariaqartut

- Inuppassuit nunatta ineriartorneranut tapertaasinnaanngillat, piginnaasatik ilisimaneqaratilluunniit akuersaarneqartuunngimmata. 

Taakkua peqataatinneqartariaqarput, tamannalu taakkununnga nunatsinnullu iluaqutaassaq, Københavnip Universitetiani professori, Minik Rosing, aamma Greenland Perspectivimi siulittasuusoq oqarpoq.

Aamma atuaruk Nunanit allaneersut tikisinneqartariaqassasut 

Greenland Perspectivip nalunaarusiaq Sitting on gold aqagu saqqumemersissavaa, tassanilu  
Nunatta inuisa piginnaasaat pisortanit akuerisaanngitsut atorlugit ineriartornissamut periarfissat sammineqarlutik. 

Suliniummi eqqarsaataavoq, inuit tamarmik piginnaasaqartuusut, inuppassuaqartorlu pinngortitamut tunngasunik piginnaasaqartunik. Immaqa nipilersorsinnaapput, asimi inuusinnaallutik, piniarsinaallutik aalisarsinaallutilluunniit. 
Immaqa pappialanik uppernasaatitaqanngikkaluartut, piginnaasalli inuiaqatigiit iluaqutiginerusinnaasaat.

Piginnaasallu pisortanit akuerisaanngitsut nunatsinnit iluaqutigineqarnissaat nukiginnarpoq. 
Tassami ilinniagaqanngitsut siunissami sivisuumi suli amerlassapput, inuussutissarsiutillu ilinniakkamik pisariaqartitsiffiunngitsut ikiliartussapput. 

Aamma atuaruk Nunatsinni inunngorsimasut amerlanerusut pisortani atorfinitsinneqartalersut

Illuani suliffissaaleqisut amerlanerat illuanilu sulisussanik amigaateqarneq ullumikkut unammillernartuuvoq. Tassalu ilinniarsimasut piumaneqarlutik. 

Taava nalunaarusiortut oqarput, piginnaasat pisortanit akuerineqanngitsut akuersaarneruleraanni inuiaqatigiinnut pissarsiaqaataassasoq. 

Taamaaliornikkut suliffissaaleqisut ikinnerulissapput, avataaniillu sulisussarsiornissaq pisariaqannginnerulerluni. Taamaalilluni inuit 
100-it sulileraangata, nunatta aningaasaqarnera 13 millionit koruuninik pitsaanerulertassaasoq ilimaginqarpoq.

Greenland Perspective Ilisimatusarfiup Københavnillu Universitetiat suleqatigiissutigisaraat.