Folketingip sulinermi avatangiisit pillugit inatsit nutaaq atulersikkaa
Folketingimi amerlanerussuteqartut inatsimmi allannguutissaq akuersissutigaat, taamaalilluni nunatsinni sulinermi avatangiisit pillugit inatsit suliffimmi avatangiisini ineriartortoqarneranut naapertuunnerulersinneqarluni nutarterneqassaaq.
Sullivinnik Nakkutilliisoqarfik tusagassiuutinut nalunaarummi allappoq.
Nunatsinni suliffimmi avatangiisit pillugit inatsit danskit inatsisaat assigingaatsiarpaat, nunatsinnili inatsit 2005-imili nutarterneqasimanngillat. Danmarkimi suliffimmi avatangiisit pillugit malittarisassat piffissamit tassanga 25-t missaannik nutarterneqarput.
Allannguuteqarnerup kingunerisaanik nunatsinni sulinermi avatangiisit pillugit inatsimmi nunatsinni soorlu piniarneq, aalisarneq aatsitassarsiornerlu pillugit pissutsit arlallit eqqarsaatigineqarnerulissapput.
Sulinermi avatangiisini tarnikkut atugassarititaasut ukkatarineqarnerulernerat
Tamatuma saniatigut suliffeqarnermi tarnikkut atugassarititaasut timikkut atugassarititaasutulli pingaartiginissaannut pisinnaatitaaffeqartoqalissaaq. Taamaalilluni suliffeqarfiit sulinermut attuumassuteqartumi suliffiup avataani tarnikkut nakuusertoqarneranut akisussaatinneqarsinnaalissallutillu inatsimmik unioqqutitsisoqarneranut akiligassinneqartarnerat ullumikkornit qaffasinnerulissaaq.
Aammattaaq inatsimmik allannguinermi sulinermi tarnikkut avatangiisit suliffeqarfiit suliffeqarfinnik naliliineranni APV-mik taaneqartartuni aamma ilaasalissapput.
Suliffeqarfiit sulinermi avatangiisit pillugit inatsisinit malittarisassanik unioqqutitisisut annerusumik aamma akiligassinneqarsinnaalissapput.
Suliffeqarnermut ministeri, Ane Halsboe-Jørgensen tusagassiuutinut nalunaarummi ima oqarpoq:
- Inatsimmi allannguineq Kalaallit Nunaanni suliffeqarnermi avatangiisit peqqinnartuunissaannik qulakkeeriniarnermut toqqammaviussapput. Kalaallit sulisartut inatsimmik allannguisoqarnerani suliffeqarnermi naapertuuttunik kalaallit Nunaannullu soorunami naapertuuttunik eqqarsaatiginninnerusunik illersorneqarsinnaanerulissapput.
Inatsisip allannguutaa 2023-mi juulip aallaqqaataani atuutilissaaq.