Folketingimut qinikkatta timersorneq sullinnialerpaat

Folketingimi Atlantikup Avannaani qinikkat suleqatigiiffiata Folketingimi ukiumi tulliuttumi suliniutissani saqqummiuppai, suliassallu politikkimut tunngassuteqartut arlallit akornanniippoq timersornermut tunngasunik suliniuteqarnissaq.

Sorsunnerup nillertup nalaani nunatta Savalimmiullu qanoq inissisimaneranik qulaajaasoqarnissaa, nunatta Danmarkimi uumasuuteqanermut tunngatillugu aalajangersaaqataasinnaanissaa, Savalimmiormiut Danmarkimiittut qanoq amerlatiginerannik qulaajaanissaq, kalaalimernik Danmarkimut eqqussisinnaanikkut nassiussisinnaanikkullu atugassaarnerulernissaq minnerunngitsumillu kalaallit savalimmiormiullu timersortartuisa OL-mut peqataasut nunaminni erfalasuminnik ilisarnaateqartarnissaat Atlantikup avannaani qinikkat suleqatigiiffiata sulissutiginiarpaa.

Kalaallit OL-mi namminneq erfalasuminnik ilisarnaateqartarnissaannik nunatsinni timersoqatigiiffiit anguniagaqartareerput, maannamut kinguneqanngitsunik, tamannalu pillugu Folketingimi ilaasortaatitagut sulissutiginninnialerput.

Kalaaleqatitta OL-mi unammeqataasut erfalasutsinnik ilisarnaateqartalernissaannik suliuniuteqarnissap saniatigut kalaallit Savalimmiormiutulli, nunat tamalaat isikkamik arsarnikkut kattuffissuannut FIFA-mut Europamilu kattuffimmi UEFA-mut aamma ilanngutsinneqarnissaat sulissutigineqassasoq, Atlatikup avannaamiut Folketingimi qinikkat suleqatigiit taama nalunaarput.