Folketingimut qinigassanngortitassaminnik piareersarput
Folketingimut januaarimi qinersisoqarnissaa arlalissuit ilimagaat, tamannalu pillugu partiit nunatsinniittut aamma piareersaleruttorput, partiillu qinigasanngortittussanik toqqartuilereerput.
Atassut immikkoortortaminut tusarniaavoq, immikkoortortat kina piukkunnerlugu nalunaaruteqarsinnaaqqullugit.
Demokraatinit Palle Christiansen oqarpoq, nammineq qinigassanngortissamaarluni allallu qinigassanngortikkusullutik aamma nalunaaruteqareersut. Demokraatit Folketingimi borgerligit suleqatiginiarpaat.
Kattusseqatigiit kikkunnik qinigassanngortitsissanerlutik suli aalajanginngilaat, siuttuallu Anthon Frederiksen oqarpoq, juullertinnagu naammassinissaat neriuutigalugu.
Inuit Ataqatigiinnit Kuupik Kleist qinigassanngorteqqinniarluni aalajangereerpoq, kikkulli allat qinigassanngortissanersut partiimit oqaaseqarfigiumaneqanngikkallarpoq.
Siumumit Lars-Emil Johansen qinigassanngorteqqinniarpoq, arnallu marluk qinigassanngorteqataasinnaanissaat partiip ulluinnarni aqutsisuisa isummiussimavaat, kikkuunersulli oqaaseqarfigiumanngikkallarpaat.
