Folketingimut qinigassanngorteqqinniarput

Folketingi marlunngorpat ammarneqarpat statsminister Anders Fogh Rasmussen qinersinissamik oqariartuuteqassasoq ilimagineqarpoq.

 Tamanna tunngavigalugu imaalluarsinnaavoq folketingimut nunatta ilaasortaatitai marluk Lars-Emil Johansen, Kuupik Kleist-ilu marlunngorpat folketingimi ammaanersiornermi naggammik oqaaseqartut.

 Lars-Emil Johansen oqarpoq qinersisoqassagaluarpat qinigassanngorteqqinnissani ilimagalugu, tamanna partii Siumup piumasarissappagu. Ilanngullugulu oqaatigaa nammineq ilimagivallaarnagu folketingimut qinersinissaq marlunngorpat oqariartuutigineqassasoq.

 Inuit ataqatigiit folketingimi ilaasortaatitaat Kuupik Kleist tamatumani isumaqataavoq oqaatigalugu, qinersisoqariataarsinnaanera ilimagisinnaallugu aammalu imaasinnaasoq taamaatoqassanngitsoq.

Lars-Emil Johansen-itulli Kuupik Kleist folketingimut qinigassanngorteqqinnissaminut piareersimanerarpoq, partiimi Inuit ataqatigiit tamanna kissaatigissappagu.