Folketingimut qinersinissamut nutaanik nalunaartoqanngilaq

Qinigassanngortinnissamut nalunaarnissamut ulloq killiliussaq ullumikkut naammassivoq, qinigassanngortittullu 16-it Naalagaaffiup Kalaallit Nunaanni Sinniisuata ungasinngitsukkut akuersissutigai.

Tassalu imaalerpoq Kattusseqatigiit Partiiat Folketingimut qinigassanngortitsinngitsoq.

Inuit Ataqatigiit, Siumut, Demokraatit Atassullu tamarmik sisamanik qinigassanngortitsipput, Folketingimi marlunnik ilaasortanngortitsinissamut - tassa maanna ilaasortaasut, Juliane Henningsen aamma Lars-Emil Johansen qinigassanngorteqqinngimmata nutaanik ilaasortartaartoqartussanngormat.

Imaalerporlu: 2007-imitorluinnaq isikkoqarpoq, partiit taakku sisamat tamarmik sisamanik taamani aamma qinigassanngortitsimmata. Maluginiagassaavorli Doris Jakobsen, Siumumeersoq, aamma Inuit Ataqatigiinneersoq, Sofia Rossen, kisimik qinigassanngorteqqimmata.

2007-imi qinersisartut 25.000-ingajaat 63,2 procentii krydsiliipput. 1998-imili aatsaat taama qaffasitsigisumik taasisoqarluni, tassa Inuit Ataqatigiit Siumullu 1998-imili qinigassanngortitsigangamik tamarmik ataatsimik tassa isertitaqartarput.

Qinersisartut 8.300-ingajaat Inuit Ataqatigiinnik kingullermik taasipput, Siumut hornorujunik arlalialunnguanik ikinnerusunit taaneqarluni. Demokraatit 4.500-init, Atassut 4.000-ingajannit taaguunneqarput, Folketingimut issiatitaqalernissaminnut amigarujussuartunit. Uanili qinersinermi qanoq isikkoqassanersoq septembarip ulluisa 15-ianni paasinarsiumaarpoq - qinersisartut apeqqutaaqaat!