Folketingimut qinersineq KNR-imi

Folketingimut qinersineq Radiokkut, TV-kkut nittartakkakkullu KNR-imit malinnaavigineqassaaq.
Allattoq Carla Davidsen
aggustip 27-at 2011 13:11

Partiit qinigassanngortittullu Folketingimi suut sulissutigissamaarneraat pingaartumik TV-kkut malinnaavigineqarsinnaassaaq.

Partiit ilisarititsissutiminnik TV-kkut qaqugu takutitsinissaat ataasinngorpat aggustip ulluisa 29-anni partiinut makitsissutigitinneqassaaq. Ilisarititsissutit sapaatip-akunnerani 36-mi aallakaatinneqassapput.
Ilisarititsissutit minutsinik qulinik sivisussuseqartut TV-kkut takutinneqartassapput, tamatumalu kingorna Radiukkut TV-kkullu ataatsikkut aallakaatinneqartumik apeqqarissaartoqartassalluni.  

Kisimiilluni qinigassanngortittoqassappat taakku ilisarititsissutiminnik, minutsinik tallimanik sivisussusilinnik, kingornatigullu ataatsimoorlutik apeqqarissaarfigineqarnissamik, tallimanngornermi septembarip ulluisa qulingiluaanni takutitsinissamut periarfissaqassapput.

Ilisarititsissutit apeqqarissaarnerillu tamarmik sapaatip-akunnerata naanerani ulluunerani aallakaateqqinneqassapput.
Marlunngornermi septembarip ulluisa 13-ianni partiit siuttui apeqqarissaarfigineqassapput.

Ullormi qinersiviusumi, septembarip ulluisa 15-ianni,  Danmarkip Radioata qinersinermit ualikkut aallakaatitai toqqaannartut malinnaavigissavavut. Nalunaaqutaq unnukkut qulingiluanut uagut nammineq qinersinermit aallakaatitsinerput Radiomi TV-milu aallartissaaq, pisarnerlu malillugu, unnuk naggaserlugu, partiit siuttui oqallitsinneqassallutik.