Folketingimut qineqqusaartut immersuiniarput

Folketingimut qineqqusaartut oqaloqatigisagut isumaqarput pissusissamisuuginnartoq folketingimut qinigaassagunik suliffitsik allanillu isertitaminnik nalunaarsuissallutik.

Demokraatineersoq folketingimullu qineqqusaartoq Per Berthelsen qinigaassagaluaruni suliaminik isertitaminillu nalunaarsuiffimmik sukkanerpaamik immersuiniarpoq, taamaalilluni tatiginassuseq naqissuserneqassammat. Per Berthelsen Inatsisartunut ilaasortaavoq, Nuummi viceborgmesteriulluni kiisalu KODA ikiorlugu sulisarpoq nutserinernillu suliaqartarluni.

Jørgen Birger Jensen Atassummit qinigassanngortittoq, namminersorluni nioqqutissanik tikisitsisartoq, angallammilu naalagaasoq oqarpoq, isumaqarluni pissusissamisuuginnartoq suliat aningaasarsiorfiillu nalunaarsussallugit. Isumaqarpoq Folketingimut imaluunniit inatsisartunut qineqqusaaraanni, inuiaqatigiinnik sullissiumalluni qineqqusaartoqartartoq taamaammallu naatsersuutigineqartariaqartoq inuiaqatigiit qineqqusaartumut tunngasunik paasisaqarusussappata.

Jørgen Birger jensen isumaqarpoq politikerit amerlavallaat imminnuinnaq sullittut inuiaqatigiillu sullinnagit.

Ilanngullugu oqaatigaa qinigaassagaluaruni sulianik aningaasarsiorfinnullu allanut nalunaarsuiffimmik immersuissalluni.