Folketingimut qineqqusaartut: Danmarkip nunarput sumiginnarpaa
IA-p Folketingimut qinigassanngortitaa Johan Lund Olsen isumaqarpoq, ilaatigut naapertuilluartumik eqqartuunneqarnissamut pisinnaatitaaffimmik unioqqutitsinikkut, Naalagaaffiup sinniisoqarfiata statsministereqarfiullu nunani tamalaani isumaqatigiissutit sumiginnarai.
- Tamanna Danmarkimut - nunat tamalaat akornanni nunat inoqqaavisa pisinnaatitaaffiinik illersuisutut nersugaasumut tulluutinngivippoq aammalu minnerunngitsumik Namminersorneq pillugu inatsimmut akerliulluinnarluni, tassami isumaqatigiissutigineqareerpoq kalaallit oqaasii tassaasut Kalaallit Nunaanni pisortatigoortumik oqaatsit. Taamak Danmark-ip pissusilersulernera imaannaanngitsorujussuuvoq sakkortuumillu avoqqaarliutigasariaqarluni, Johan Lund Olsen allappoq.
Aamma Atassutip folketingimut qinigassanngortitaata, Steen Lyngep, inatsisit nutserneqarsimanngineri isoreqai.
Naalagaaffiup sinniisoqarfiata inatsisinik nalunaarutinillu tamanut saqqummiussisussanini naammassisimanngimmagu, naapertuilluartumik eqqartuussiveqarnermi kanngunarsaataasutut taavaa.
Tamanna inuit pisinnaatitaaffiinik tunngaviliisunik tamanna unioqqutitsinerusoq, Steen Lynge, oqarpoq, taassumalu nutserinissamut naammattunik Folketingi aningaasaliissasoq kissaatigaa, nunatsinni innuttaasut naapertuilluartumik atugaqartinneqalernissaaq qulakkeerneqassammat.
