Folketingimut qineqqusaartut aammalu
Folketingimut qinersinissamut qinigassanngortittut allat marluk aamma ilisaritippavut.
Taakku tassaapput, Doris Jakobsen, 26-nik ukiulik, Siumut sinnerlugu inatsisartunut ilaasortaq aamma Atassut sinnerlugu qinigassanngortittoq, Jørgen Birger Jensen 56-inik ukiulik, 1980-imi ilinniartitsisutut atorfinilluni Kalaallit Nunaannut tikittoq, maannalu piniutinut tunngasunik tuniniaasartuusoq.
Doris Jakobsenip inuusuttuaraallunili naalakkersuinermik suliaqarneq aallutilersimavaa, oqarneratullu suli piumassuseqarluarami folketingimut qinigassanngortilluni. Tamatumani aamma inuusuttut nipaasa folketingimi inissaqartinneqarnissaat pingaartinnerarpaa.
Jørgen Birger Jensenip qinigassanngortinnerminut pissutiginerarpaa, isumaqarami inuit isumaasa tusaaniarnerisigut maannakkut folketingimut qineqqusaartunit pitsaanerusumik inuiaqatigiit kalaallit sullissinnaallugit.
Naalakkersuinermik suliallit akornanni amerlavallaarnerarpai qinigaagaangamik qinersisitik puigorlugit imminuinnaq eqqarsaatigisut.
- Assigiinngitsutigut sakkortuunik isummersorsinnaasarpunga, tamanna ilaatigut iluaqutaallunilu ajoqutaasinnaasarpoq. Kisianni tassa inuttut taamaattuuvunga, Jørgen Birger Jensen oqarpoq.
