Folketingimut qineqqusaarneq siulleq
Peter Aqqa Lyberth Sisimiut Tusaataaniit aaqqissuussaasumi qineqqusaarnermi aqutsisuusoq oqarpoq inuit 30-it 40-llu akornanniittut apeqqarissaarsimasut.
Sammineqartut assigiinngiiaarput, soorlu silaannaap allanngoriartorneraniit, arfaniarnermut, Pituffimmilu pissutsinut tunngasunik apeqquteqartoqartartoq.
Naak qineqqusaarneq amerlagisassaanngitsunik orninneqaraluartoq tusarnaartut amerlanerungaatsiarsimassapput, tassami qineqqusaarneq Aasianni, Sisimiuni, Maniitsumi Paamiunilu lokalradiuni tusarnaartut qineqqusaaartunik tusarnaarput.
Oqallisigineqartut ilagivaattaaq Atlantikup Avannaani Suleqatigiit ingerlaqqissanersut. Siumut Inuit Ataqatigiillu suleqatigiinnerup ingerlaannarnissaannik isumaqarput, demokratit konservativinut ilanngunniartut Atassullu Venstrenut ilanngunniartut.
Aqagu sapaammi qineqqusaarnerit KNR-ikkut toqqaannartumik aallakaatinneqartussat Qaqortumi ingerlanneqassapput.
Ilisimatinneqarpugut sila patsisigalugu Qaqortumut qineqqusaariartussat suli aallarsimanngitsut, kisiannili aqagu ullaakkut arfineq pingasunut aallariartoqqissasut.
