Folketingimut qanoq ililluni qinerseqataasoqarsinnaanerpa
Ullormili qinersivimmi angerlarsimanngikkaanni – taava?
Kinaluunniit Danmarkip naalagaaffiani innuttaasoq, 18-inik ukioqalereersimasoq, Kalaallit Nunaanni Danmarkimiluunniit najugaqavissoq Folketingimut qinersisinnaavoq. Nunatsinni inuit amerlanersaat malittarisassani taakkunani pineqarput, kalaallimmi aamma ”danskit naalagaaffianni innuttaammata”.
Pingaartutulli eqqaasariaqarpoq qinersineq pissammat kommunip angerlarsimaffeqarfiup qinersiviani. Angerlarsimaffeqarfimmi kommunimi qinersisinnaasut allattorsimaffiannut ilangunneqassagaanni qinersinissaq ullunik 18-inik sioqqullugu, tassa tallimanngormat oktobarip ulluisa 26-ani, inuit allattorsimaffianni allatsereersimasariaqarpoq.
Inatsillu taanna tamanut, kalaallinut qallunaanullu atuuppoq.
Qinersinissaq sioqqullugu ullut 18-it kingorna nuussimagaanni, imaluunniit suli kommunip nuuffigisap inunnik allattorsimaffianut nalunaarsimanngikkaanni, taava kommunimi qimatami qinersisinnaasut allattorsimaffiani suli nuussimasoq ilaassaaq, taamaammallu allakatigut qinersisariaqassalluni. Taanna inatsit kikkunnulluunniit atuuppoq; nunatta iluani nuussimagaanni imaluunniit Danmarkimiit Nunatsinnut nuussimagaanni, tallimanngormat inuit allattorsimaffianni allatsissimanngikkaanni allakatigut qinersisariaqarpoq. Allakkatigut qinersiniaraanni Danmarkimi, Nunatsinni Savalimmiuniluunniit inuit allattorsimaffiisa arlaannut saaffiginnittariaqarpoq, nunanilu allaniikkaanni Danmarkip aallartitaqarfiannut saaffiginnittariaqarpoq. Allakkatigut qinersiniaraanni maannangaaq kingusinnerpaamillu sapaatip akunerani tulliuttumi qinersisariaqarpoq, allakkammi kisitsinermut ilanngunneqassagunik ulloq qinersivik ullormik ataatsimik sioqqullugu kommunimit qinersisinnaasutut allassimaffimmit tiguneqareersimasariaqarmata.
Kalaallit Danmarkimi ilinniartut, Danmarkimilu inuit allattorsimaffianni ilanngunneqareersimasut Danmarkimji qinersisut allat assigalugit qinersisariaqarpoq, tassa Nunatsinni qineqqusaartut taakkunannga qinerneqarsinnaanngillat.
Sivikitsuinnarmilli Danmarkimiikkaanni, sulilu pisortatigoortumik Nunatsinni kommunimi angerlarsimaffeqarfimmi allaqqalluni, taava allakkatigut qinersisariaqarpoq.
Pinerluuteqarsimasunut isertitsivimmiikkaanni napparsimavimmiluunniit uninngagaanni taava taakkunani qinersisoqarsinnaavoq. Imarsiortut umiarsuarmiit allakkatigut qinersisinnaapput.
