Folketingimut ilaasortat puisit amii pillugit tapersiisut
Folketingimut ilaasortat arlallit puisit amii Kalaallit Nunaanneersut siuarsarniarlugit politikkikkut sammiviit akimorlugit suleqatigiinniarlutik isumaqatigiissimapput.
- Puisit politikkikkut oqallisigineqalissapput. EU’p puisinit tunisassianik eqqusseqqusiunnaarnera paasisanik tunngaveqarani misigissutsinik tunngaveqarpoq. Taamaattumik Danmarkimi EU-milu pisamut ilisimasaqassuseq aallaaviusinnaaqqullugu puisit amiinut sammisaqarneq ilisimasaqalersitsinerlu assorujussuaq pingaaruteqqarput. Folketingimi ilaasortat taamak amerlatigalutik suliniut tapersersormassuk assut nuannaarutigaara, Folketingimi ilaasortaq Sara Olsvig (IA), Folketingimut ilaasortat tapersiisut qulingiluaasut ilaat taama oqarpoq.
Doris Jakobseni soorunami taakkununnga aamma ilaavoq:
- Kalaallit ukiuni tuusintini arlalinni puisinniartarsimapput, piniarnerlu WWF-imiit tapersersorneqarpoq. Puisit amiinit tunisassiat nungusaataanngitsumik tunngaveqarluinnarput, qaavatigullu assorujussuaq kusanarlutik. Puisit amiutigut tulluusimaarutigeqaagut”, Folketingimut ilaasortaq (S) Doris Jacobsen oqarpoq.
Puisit amiinik siuarsaaniarlutik politikkikkut soqutigisat akimorlugit suleqatigiit, suliniutertik malunnarsarniarlugu, dronningi marsip 12-iani 2014-imi kunngikkormiut qititsitsinissaannut qaaqqusippat puisit amiinik atisalianik assukkersorniarput.
Lone Loklindt, De Radikaleneersoq puisip amianik kavaajaaraqassaaq Mia Lisa Sponimit ilusilersorneqarsimasumik. Ellen Trane Nørby, Venstrep politikkikkut oqaaseqartartua, puisip amianik tuequteqassaaq JSPR Jensenip ilusilersugaanik. Dansk Folkepartiip ineqarnermut innarluutilinnillu sullissineq pillugu oqaaseqartartuat Karina Adsbøl qatanngutimi Justian Kunzip ilusilersugaanik mersugaanillu kjoleqassaaq puisillu amianik qallersaateqassalluni. Socialdemokraatit Kalaallit Nunaannut tunngasunut oqaaseqartartut Flemming Møller Mortensen puisip amianik qilerniusaqassaaq Great Greenlandimit aamma Kopenhagen Furimit suliarineqarsimasumik. Minnerunngitsumillu Sara Olsvig IA-meersoq aappaluttumik taartumik puisip amiinik pinnersaasersukkamik attariimmik kjoleqassaaq Sisimiuni Lennert Designimit ilusilersorneqarsimasumik. Aammattaaq qangatut avittakkamik pooqattaaraqassaaq. Doris Jakobsen kjolemik Najannguaq Lennertip ilusilersugaanik puisip amianik sinaakkusersukkamik atuissamaarpoq. Qititsitsisoqarnissaanullu peqataasinnaassanerluni nalugallarpaa, nunanut allanut politikkikkut ataatsimiititaliap Malimut Nigeriamullu angalaneranut ilaagami aammalu isigimigut annertuumik aseruuttooqqalluni.
Enhedslistenip Kalaallit Nunaannut tunngasunut oqaaseqartartua Finn Sørensen, SF-ip EU, avatangiisit akileraartarnerlu pillugit oqaaseqartartua Lisbech Bech Poulsen attaviitsorlu Uffe Elbæk suliniummut tapersiipput, taakkuli qititsitsinermut peqataassanngillat.
