Folketingimut ilaasortat piareersarput

Politikerit taakku marluk folketingip nunarput pillugu ataatsimiititaliaani nunanut allanut ministerimik Per Stig Møllerimik, timmisartup B-52-ip qaartartorsuarnik usilluni Pituffiup eqqaani 1968-imi nakkarnera pillugu aqagu isumasioqatigiinnissamut piareersarluarsimasussaapput. Jens Zinglersenip aqagu isumasioqatigiinnissami peqataasussaasup, isumasioqatigiinnerup pineqartup puigorneqannginnissaanut ilapittuutaanissaa neriuutigaa.

Folketingimut ilaasortanit arlalinnit ministerinut apeqquteqaateqartoqartarpoq, ilaatigut Enhedslistenimeersumit Line Barfodimit, nunanut allanut ministeri aperineqarnikuuvoq.

Apeqquteqaatit tamakkua, isumaga naapertorlugu, assut erseqqarluttumik akineqartarput.

Pineqartumut isiginneriaasera naapertorlugu, kissaatigaara folketingimut ilaasortat tunngavilersorluakkanik apeqquteqartarnermikkut, naalagaaffimmit akissutigineqartartut tamakkua erseqqarluttut paasinarnerulersissinnaassagaat. Taamaalilluni pisimasup maanna ukiut 41-nngulersut qaangiunnerisigut, pineqartoq pillugu isertukujukkunnaarluni pisimasut eqqortumik saqqummiunneqarsinnaanissaat, Pituffimmi sulisartuusimasut peqatigiiffianni siulittaasutut neriuutigaara, Jens Zinglersen naggasiivoq.

Line Barfod Enhedslistenimeersoq, folketingip nunarput pillugu ataatsimiititaliaani ilaasortaasoq aqagu isumasioqatigiinnissami aamma peqataassaaq.