Folketingimut ilaasortat inatsisit nutserneqartarnissaat qulakkeerusuppaat
- Tamanna akuerineqarsinnaanngilaq. Kalaallimmi oqaasii Kalaallit Nunaanni oqaatsitut siullertut inissisimaneri ataqqineqartariaqaraluarput. Inatsisimmi Kalaallit Nunaanni aamma atuuttut innuttaasut atuarsinnaasariaqarpaat paasillugillu, Doris Jakobsen oqarpoq.
Sara Olsvigilumi aamma isorisassaqarpoq:
- Ukiuni arlalinni inatsisit nutserneqanngitsoortarsimaneri uggornartikkaluaqaara, Rigsombuddeqarfiulli suliaq ingerlatilereermagu nuannaarutigivara, Sara Olsvig oqarpoq.
Inatsisit nutaat nunatsinni aamma atuuttut nutserneqanngitsoortarneri siorna KNR-imi samminiariarivut Rigsombuddeqarfik aalanialerpoq.
Ulloq mannalumi tikillugu inatsisiliat 139-t nutserneqarlutik naammassineqarsimasut Rigsombuddep nittartagaani atuarneqarsinnaavoq.
Inatsisilialli 40-t missaaniittut suli nutserneqarsimannginneri paasinarsivoq, Rigsombudsmandilu Mikaela Engell-ip inatsisit nutserneqarniarneri ilimagisamininngaanniit sivisunerusumik nutserneqartariaqarsimaneri qanittukkut nassuerutigereeralu Sara Olsvig tamatumunnga ima oqaaseqarpoq:
- Uagut, aammalumi Ministeriunerup allaffeqarfiata pissutsit taamaanneri siunissami piareersimaffigisariaqarpaat. Tassami nutsigassat akisusarneri piffissaajarnarnerilu piareersimaffigisariaqarput, aatsaammi taamaasiortoqarsinnaappat innuttatta aamma atuarsinnaaniassammatigit, Sara Olsvig oqarpoq.
Nutserisunut Rigsombuddeqarfiup avataaneersunut aningaasat atugassat 100.000-t Ministeriuneqarfiup aningaasaliiffigereerpai, aningaasalli taakku amigarpallaarujussuarput, Doris Jakobsen taama oqarpoq imalu nangilluni:
- Danmarkip nutsigassanut naammattunik aningaasaleerusussuseqannginnera kanngunaannarpoq, tassami EU qallunaanut taamatut uagutsinnut pinninnerattut pissusilersortuugaluarpat qallunaat nipangeqqaannarnavianngikkaluartut naatsorsuutigineqarsinnaalluarpoq, Doris Jakobsen oqarpoq.
Folketingimi ilaasortaatitavut tamarmik suliaq pillugu Ministerinut apeqquteqassamaarput.