Folketingimi unnuk kulturisiorfik
Kalaallip atisanik ilusilersuisartup, Bibi Chemnitzip, atisaliai kusanarluinnartut, "Street Couture-mik" qulequtserneqarlutik, unnugu ilaatigut takutinneqassapput.
- Kalaallit atisat ilusilersugaat kusanarluinnartut nutaaliaanerpaallu ukioq-manna aallunniarpavut. Kulturikkullu unnussiornissaq iluatsiinnarlugu Kalaallit Nunaat ajunngilluinnartumik nittarsaanniarparput. Christiansborgip inunnit ornigarluarneqartarnera iluatinnaqimmat taamatut aaqqissuussiniarpugut, Sara Olsvig oqarpoq.
Saqqummiunneqartussalli atisanut tunngassuteqaannassanngillat. Issittumi aatsitassat, nunanullu allanut politikki pillugu videoliaq aamma takutinneqassaaq, tamatumalu saniatigut KNAPK-p piniartunik tapersersuinissamik suliniutaanut atatillugu tajat puisip amiannik sanaat aamma pisiarineqarsinnaassallutik.
Kulturikkut unnussiorneq maani aamma malinnaavigineqarsinnavoq. Qarasaasiaqaruit internettimullu attaveqarlutit www.iafolketinget.dk -mut iseriarlutit assit saqqummiunneqartussat takusinnaassavatit.