Folketingimi tusarnaartut nipituuliortut

Danmarkimi nunasiniarlutik qinnuteqartut pillugit Folketingimi ullumi oqallittoqarmat isummat assiigiinngitsut imaaginnavipput.
Allattoq Elisa Isaksen
januaarip 23-at 2008 17:06

Nunatta Folketingimi ilaasortaatitaasa Dansk Folkepartiimeersunut akissutaat arlaleriarlutik ataatsimiittarfimmiit nipituumik taperserneqartarput.

Folketingimi ataatsimiittarfik ilaasortanik, tusarnaartunik tusagassiortunillu pisarnermiit ullumi inoqarneruvoq. Kalaallit ilaasortaatitaat oqaluttarfimmut qaqisalermata oqallinneq sakkortusivoq, minutsinilu 26-ni oqalugiarmata Dansk Folkepartiimeersut nipituuliortaleraluarput.

Søren Espersenip, Martin Hendriksenip siulittaasuatalu Pia Kjærsgaardip Kalaallit Nunaanni pissutsit eqqartorusunneruaat. Kalaallit ilaasortaatitaasa oqalunneranni Folketingip ataatsimiittarfiani tusarnaartut ilaat tapersiisarlutik ilaallu assortuillutik nipituuliortarput, soorlu qaqugukkut kalaallit ilaasortaatitaat taaseqataasarnersut Martin Henriksenip apeqqutigimmagu Juliane Henningsen akissuteqarmat. PIP

- Folketingimi taasissutigineqartut ilaannut taaseqataasannginnera naapertuilluartuunersoq apeqquserneqassappat maani oqaluttarfimmiit akerusunngilara, siornatigut oqaatigereerpara una maanna sammisarput meeqqanut inuillu pisinnaatitaaffiinut tunngasuummat immikkorluinnaq isigisariaqartoq, inuit eqqartukkavut Danmarkimi nunasiniartunut politikki ingerlanneqartoq naapertorlugu sumiginnarneqarsimammata, Juliane Henningsen akissummini oqarpoq.

Lars-Emil Johansenilu ilaatigut oqarpoq:

Meeqqat Danmarkimi nunasiniartut inissinneqartarfiiniittut atugaat, 2006-imili maajip qaammataani soqutigisarilerpakka, taamani meeqqat taakku pillugit siunnersuuteqartunut ilaagama, kingornatigullu taasissutigineqarmat taaseqataagaluarama kikkunnilluunniit qisuariarfigineqanngilaq. Taamaammat Pia Christmas-Møllerip siunnersuutaa aqagu taasissutigineqalerpat tapersersorlugu taaseqataassamaarpunga.

Søren Espersen oqaluttarfimmiit ilaatigut oqarpoq Villy Søvndahlip qanoq isiginnittarnerata saniatigut allatut Danmarki aamma isigineqarsinnaasoq Lars-Emil Johansenip nuannaarutigimmagu, aamma nammineq nuannaarutigalugu hr. Lars-Emil Johansenip qanoq isiginneriaasaata saniatigut allatut Kalaallit Nunaat isigineqarsinnaammat nammineq nuannaarutiginerarlugu.

Danmarkimi nunasiniartut pillugit siunnersuut aqagu taasissutigineqassaaq.