Folketingimi paarlatsippoq
Sara Olsvig Folketingimi ukiup aappaata qeqqa issiasimavoq, Inatsisartunullu ukioq manna marsimi qinersisoqarmat qinigaalluni.
- Inatsisartuni sulinissara aallussinnaanngorpara. Tamanna pingaartippara, pingaartumik qinersereernerup kingorna siullerpaamik ataatsimiittoqartussaammat, Sara Olsvig oqarpoq.
Arlariinnik ilaasortaaffeqarneq, soorlu Folketingimi Inatsisartunilu ilaasortaaffeqarneq piffissap ingerlanerani oqallisaasimaqaaq. Pingaartumik inatsisiliorfinni marlunni sulinermi marlunnik akissarsiaqarneq pillugu oqallittoqarsimavoq, Sara Olsvigilli tamanna illersorpaa oqarluni sulinermut pingaaruteqartoq:
- Inatsisiliorfinni marlunni taakkunani suliassat amerlaqaat, peqataalluarnissarlu pingaaruteqarpoq. Suliassat ataqatigiississinnaagikka takusinnaavara, pingaartumik inunnik isumaginninnermut tunngasunut kalaallillu Danmarkimi inuuniarnermikkut ajornartorsiuteqartut pillugit sulinermi ilaasortaaffeqarfiit taakku marluk pingaaruteqarput, Sara Olsvig oqarpoq.
Folketingimit sulinngiffeqarallarnissaq pisortatigoortumik septembarip ulluisa arfineq-pingajuanni aallartissaaq, sapaatip-akunnera ataaseq eqqaassanngikkaanni, tassami Sara Olsvig Issittut Inatsisartuisa Ataatsimiititaliaata Ruslandimi Murmanskimi ataatsimiinnissaannut peqataasussaavoq, ataatsimiititaliami tassani siulittaasuugami. Johan Lund Olsen, Inuit Ataqatigiinneersoq, Sara Olsvigip Folketingimit sulinngiffeqarallarnerani taartaassaaq.
- Oqaluuserineqartussatut partiip pingaartitai soorunami aallussavavut. Suliallu ingerlanneqartut taamaammat ingerlateqqissavai. Suliassanilli nammineq pingaartitaminik soorunami aamma aallussaqarsinnaavoq, Sara Olsvig, parteeqatini pillugu ilaatigut taama oqarpoq.
Doris Jakobsen inatsisiliorfinnik marlunnik aamma ilaasortaaffeqarpoq, assersuutigalugulu Folketingimit sulinngiffeqarallarnani Inatsisartuni aamma sulilluni.
