Folketingimi oqallinneq ministeriunerup iluarisimaarpaa
Tamanna ministeriunerup iluarisimaarlugu oqallinnerup kingorna ilisimatitsissutigaa.
- Namminersorneq pillugu isumalioqatigiissitap isumaliutissiissutaa folketingimi amerlanerussuteqartut akuersissutigeereermassuk, naalakkersuisut siulittaasuat Enoksen, sapaatip akunnerata uumap ingerlanerani ataatsimeeqatigissavara, ingerlariaqqinissaq pillugu isumaqatigiissuteqassalluta.
Inatsisissatut siunnersuut pillugu kalaallit qallunaallu naalakkersuisuisa isumaqatigiissuteqarnissartik naatsorsuutigaat.
- Isumaqatigiissut taanna innuttaasunik taasisitsinissamut novembarip ulluisa 25-anni pisussami tunngaviusussaavoq.
Namminersorneq pillugu taasisitsinermi kalaallit akuersippata, kalaallit nunaanni inatsisartut taamatullu folketingimi inatsit aalajangiiffigineqassaaq, taamaalilluni Kalaallit Nunaanni Namminersorneq aappaagu juunip ulluisa 21-anni atuutilersinneqarsinnaaniassammat.
Namminersorneq pillugu aaqqissuussineq, Danmarkip Kalaallit Nunaatalu akornanni ukiuni amerlasuuni ataqatigiinnissaanut tunngaviusussaavoq, taamaattumillu nuannaarutigaara, folketingi tamangajalluinnarmi, danskit naalakkersuisuisa suliaat aallaavigalugu isumaqatigiimmat, taamaattumillu naatsorsuutigaraa, Hans Enoksen-ilu inatsimmut siunnersuummut isumaqatigiisuteqarumaartugut, taanna kingorna innuttaasunut taasisitsissutigineqartussamut. Namminersorneq naalagaaffeqatigiinnerup iluani ingerlanneqartussaammat nuannaarutigivara, Anders Fogh Ramussen oqarpoq.
- Oqartussaaffiit sorliit qanorlu annertutigisut tigujumanerlugit kalaallit nammineerlutik aalajangertussaavaat. Oqartussaaffiit tigusatik kalaalit namminneq akilertassavaat, Anders Fogh Ramussen oqarpoq.
