VIDEO Folketingimi kalaallit aningaaserivinnut piumasaqaataasa sukaternissaat isumaqatigiissutigaat
Oqaaseqartartut ataasiakkaarlutik siunnersuut oqaluttarfimmit oqaaseqarfigisaqattaarpaat. Siunnersuut Inatsisartut Inuussutissarsiornermut Ataatsimiititaliaannit isumaqatigiittumit akuerineqarnikuuvoq, nuna aningaasaali aningaasaqarnermullu politikki danskit naalagaaffiannit suli oqartussaaffigineqarmat, Folketingemi akuerineqaqqaassaaq.
Enhedslistenimit mianersoqqussut
Henning Hyllestedip Enhedslistemeersup siunnersuut mianersoqqussuteqarfigaa, partiip isumaa malillugu Kalaallit Nunaata EU-mi malittarisassanut akuerineqartunut sunniisinnaanissaanik killiliissammat.
- EU-p aningaaserivinnut piumasaqaatai aningaasarliortoqaqqinnissaanut illersuutaanngillat.
- Kalaallit Nunaata aningaasaqarnikkut isumaginnittoqarfitsik EU-mut tunniunnissaanik, uterteqqinnissaanullu ilimagisaqassanatik, tamanna kingunneqassaq. Tamannalu nunamut EU-mut ilaanngitsumut eqqumiissasoq isumaqarpugut, Henning Hylælested oqarpoq.
Enhedslistenilli Inatsisartut aalajangiussaat tusaatissatut tiguaat siunnersuullu akueralugu.
Aamma atuaruk EU Danmarkimut inatsisiliortarpoq - Danmark naalagaaffeqatigiinnut
Patajaattuunissaq aningaasaliisussallu pineqarput
Inuit Ataqatigiittaaq siunnersuut akuerivaat, Aaja Chemnitz Larsenillu Enhedslistenip isumakuluuteqarnerminnik oqarnerannut qujaffigai.
- EU-mut tunngatillugu isumakuluuteqarneq paasisinnaalluarpara, EU-mi Kalaallit Nunaanni pissutsinut annertusigaluttuinnartumik sunniuteqarpoq, uagut namminneq sunniuteqarfigisinnaanngisatsinnik. Kalaallit Nunaannut aningaasaliisut aalaakkaanissaat qulakkeerniarlugu, ajornartorsiutaasinnaasut iluaqutaasinnaasullu eqqarsaatigineqareerput, siunnersuut akuerineqarpoq.
- Kalaallit Nunaanni aningaaseriviit unammillersinnaasut, aningaasaliisussanullu sinaakkutissat isumaqatigiissutinik erseqqissunik imallit pilersinniarneqarput, tassalu tamakku inuiaqatigiit kalaallinut iluaqutaasussat, Aaja Chemnitz Larsen oqarpoq.
Siunnersuutip aappassaaneerneqarnissaa folketingemeeqatini Aleqa Hammond, Siumut, sinnerlugu innersuussutigaa.
Aamma atuaruk Uranip nunatsinneersup sakkussiornermut atorneqannginnissaa anguniarneqarpoq
Ineriartorneq oqartussaanermit pingaarneruvoq
Henning Hyllestedip tupigusuutigaa Inuit Ataqatigiit oqartussaassusertik EU-mut tunniukkusummassuk, Kalaallit Nunaannili ineriartortoqarnissaa anguniarneqartoq, Aaja Chemnitz Larsen nassuiaavoq.
- Kalaallit Nunaata ineriartortinneqarnissaa pingaaruteqartorujussuuvoq. Pisariaqartipparput aatsitassarsiornerinnarmiunngitsoq aallanili aamma aningaasaliisoqarnissaata oqaluuserinissaa, Aaja Chemnitz Larsen erseqqissaavoq.
Siunnersuutip akuerinissaa tamanit isumaqatigiissutaammat, siulittaasuugallartup Erling Bonnesenip siunnersuut Folketingip Kalaallit Nunaannut tunngasunut ataatsimiititaliaanut suliassanngorlugu ingerlateqqissinnaanngorpaa.
"Inaatarsiusitut"
Oqaaseqartartut oqaaseqaataat uani takuuk, qanorlu Inatsisartut taaneraat tusarnaarlugu. Naggataatigut inuussutissarsiornermut ineriartortitsinermullu ministerip Troels Lund Poulsenip Inatsisartut ”Inaatarsiusitut”-imik taavai, taamalu oqariarluni, Folketingimi issiasut qungujulaneranni, utoqqatserpoq.