Arnat kisimiittut arnaqatiminnoortartullu naalagaaffiup akiligaanik ikkussiffigitillutik naartusinnaalernerat amerlanerussuteqartunit akuersissutigineqarpoq.
Illuatungiliuttut Venstremilu ilaasortat ikittunnguit akuersimmata amerlanerussuteqartut akuersipput.
Dansk Folkepartimit sakkortuumik tamanna akerlerineqarpoq. Peqqinnissaq pillugu oqaaseqartartuutitaq Birthe Skaarup ima oqarpoq:
- Folketingimi ilaasortaasugut pinngortitsisutsinnut unammillersinnaanngilluinnarpugut. Meeqqap ataataqarani peroriartornissaa aalajangiiffigisinnaanngilarput, Birhe Skaarup oqarpoq.
Naalakkersuinermik suliaqartut ilaat pakatsigaluartut arnaqatiminnoortartut tusarnaariarsimasut nuannattunnguupput. Ilaat ima oqarpoq:
- Ikkussiffigitilluni naartusinnaanermut inatsit arnarpassuarnit atorneqassasoq ilimagaara, Anja Bang Jensen oqarpoq.
Nunatsinni ikkussiffigitilluni naartusinnaaneq suli neqeroorutigineqarneq ajorpoq. Naalakkersuisunulli ilaasortaq, Asii Chemnitz Narup, oqarpoq, innuttaasunit tamanna oqallisigineqarumaartoq.