Folketingimi illuatungiliuttut misissuisoqarnissaq piumasaraat
Nunanut allanut tunngassuteqartut tamarmik Danmarkimit akisussaaffigineqarlutik ingerlanneqartarput. Tassa Danmarkip Kalaallit Nunaatalu akornanni tatigeqatigiinnissaq pisariaqarluinnarpoq. Tatigeqatigiinneq taanna piumasaqaataasoq siornatigut innarlerneqartareerpoq, soorlu Pituffimmi sakkunik atomitalinik inissiisarsimaneq eqqarsaatigalugu. Maannakkut aamma Itillermi isumaqatigiissut naapertorlugu Danmarkimi naalakkersuisut apeqqutini Kalaallit Nunaannut tunngasuni Kalaallit Nunaanni naalakkersuisut ilisimatinneqartarnissaannik piumasaqaat unioqqutinneqarsimappat tatigeqatigiinneq inarlerneqaqqissimassaaq. Tamannali uppernarsiniarlugu Kalaallit Nunaannit Folketingimi ilaasortaasugut naalakkersuisunullu illuatungiliuttut ilagalugit misissuisoqarnissaanik piumasaqaqqittariaqarpugut. Misissuinissamik piumasaqaat Folketingimi amerlanerusunit tapersersorneqassanersoq suli nalunaraluarpoq, kingullermilli asseqqinnaanik piumasaqaratta Naser Khaderi taamani Radikalinut ilaasortaasoq siunnersuuteqaqataavoq, maannakkut pissanganassaaq suli Khaderi Kalaallit Nunaata iluani pisimasunik missueqqusinermut isumaqataanersoq, Lars-Emil Johansen DR deadlinemut ippassaq unnukkut oqarpoq.
Manna tikillugu Socialdemokratit, Radikalet, SF, Enhedslisten, Kalaallit marluk Pia Christmas-Møllerilu misissuisoqarnissaanik piumasaqarnissamut isumaqataapput. Ny Alliancemeersut isumaqataassappata misissuisoqarnissaanik piumasaqartut Folketingimi amerlanerussuteqalissapput.