Folketingimi ilaasortat suliartorput

Folketingip ukiua nutaaq ullumi aallartippoq. Naalakkersuisut siulittaasut Kuupik Kleist aamma Inatsisartut Siulittaasuat Josef Motzfeldt ammaanersiornermut peqataapput.
Allattoq Elisa Isaksen
oktobarip 05-at 2010 04:45

Ulloq nalunaaqutaq qulinut aallartinneqassaaq Christiansborg Slotskirkemi Folketingimut ilaasortat naalagiaqatigiinnerannik. Dronningi kunngikkormiullu allat Christiansborgimut nalunaaqutaq ullup-qeqqanut tanneq qulingiluat apuutissapput Rigsdagsgårdimilu Folketingip majuartarfissuini natersuaaqqap tummarfissiap aappaluttup isuani Folketingip siulittaasuanit tikilluaqquneqassallutik.

Ataatsimiinneq siulleq nalunaaqutaq ullup-qeqqanut aallartissaaq. Folketingip siulittaasussaanik tullissaanillu sisamanik nutaamik qinersisoqareerpat ministeriuneq Lars Løkke Rasmussen ammaanersiorluni oqalugiassaaq. Ammaalluni oqalugiaat Folketingip ataatsimiittarfiani oqallinnerit sivisunerpaasartut ilaannut, tassalu ammaanersiorluni oqallinnermut, ullut marluk qaangiunnerani pisartumut, aallaaviussaaq.